काठमाडौं । विश्व क्रेडिट युनियनको परिवार ठूलो बन्दैछ । सन् २०२२ मा व्यक्तिगत सदस्य संख्या ४० करोड बढी रहेको विश्व क्रेडिट युनियन अभियानको परिवार संख्या सन् २०२३ मा बढेर ४१ करोड १० लाख बढी पुगेको छ । क्रेडिट युनियनमा आबद्ध व्यक्तिगत सदस्यहरुको संख्या १ अर्ब पुर्याउने महत्कांक्षी लक्ष्य अघि सारको विश्व ऋण परिषद् (ओकू) ले यसलाई महत्वपूर्ण उपलब्धि संज्ञा दिएको छ । यद्यपि, यो वृद्धिदर भने ठूलो होइन ।

तर, कुल क्रेडिट युनियनहरुको संख्या भने अघिल्लो वर्षको तुलनामा घटेको छ । सन् २०२२ मा ओकूको सञ्जालभित्र ८२ हजार बढी क्रेडिट युनियनहरु अटाएका थिए भने सन् २०२३ मा ७४ हजार ६ सय बढीमा सीमित भएको छ । ओकूको तथ्याङ्क अनुसार सन् २०२३ मा डोमिनिका, नेपाल, ब्राजिल र बेलायतमा सदस्य संख्या बढेको हो । ओकूले ब्राजिलको वृद्धिदरलाई समान दरमा भएको वृद्धि भनेको छ । यसैगरी, डोमिनिका र नेपालमा पनि भएको वृद्धिदरलाई ओकूले उत्साहजनक भनेको छ ।

यसैगरी, क्रेडिट युनियन अभियानमा सहभागी विश्वका मुलुकहरुको संख्या पनि बढ्दो छ । सन् २०२२ मा ९८ मुलुक रहेकोमा सन् २०२३ मा यो सख्ंया १०४ पुगेको छ । यसले पनि क्रेडिट युनियनहरुको विश्वव्यापी प्रभाव बढेको पुष्टि गरेको छ ।

ओकूले विगत एक दशक (सन् २०१४ देखि २०२३) मा विश्व क्रेडिट युनियन अभियनको सदस्यता ८९ प्रतिशतले वृद्धि भएको तथ्याङ्क सार्वजनिक गरेको छ । त्यसमा सबैभन्दा महत्वपूर्ण योगदान एशिया महादेशको रहेको ओकूले जनाएको छ ।

आइसीयू डे को पूर्वसन्ध्यामा विश्व ऋण परिषद् (ओकू) ले सार्वजनिक गरेको तथ्याङ्क अनुसार हाल विश्वका १०४ मुलुकका ७४ हजार ६ सय ३४ क्रेडिट युनियनमा कुल ४१ करोड १० लाख ८ हजार बढी जनसंख्या आबद्ध छ । यो अभियानको कुल सम्पत्ति ३.७ ट्रिलियन अमेरिकी डलर रहेको छ । अघिल्लो वर्ष भने ९८ मुलुकका ८२ हजार ७ सय ५८ क्रेडिट युनियनमा ४० करोड ३९ लाख ७६ हजार ४९ जनसंख्या आबद्ध थियो ।

यसो हुनुमा क्रेडिट युनियनहरुबीच भएको एकीकरण एक प्रमुख कारण हो । संख्या घटाएर सदस्यता विस्तार गर्दा बजारमा प्रतिस्पर्धी स्थान तय गर्न सकिने कारणले पनि एकीकरणको विश्वव्यापी लहर चलेको हो । अमेरिकी क्रेडिट युनियनका दुई केन्द्रीय संघहरु क्रेडिट युनियन नेशनल एशोसिएसन (क्यूना) र नेशनल एशोसिएन अफ फेडेरल्ली इनस्योर्ड क्रेडिट युनियन (एनएएफसीयू) बीच एकीकरण भएर हाल अमेरिकाज् क्रेडिट युनियन्स बनेको छ भने थुप्रै उत्तर अमेरिकी क्रेडिट युनियनहरु मर्ज भएका छन् । यसैगरी, अफ्रिका, दक्षिण अमेरिका, एशिया लगायतमा पनि क्रेडिट युनियनहरु एकीकरण भएका छन् । 

अमेरिकाको बोस्टन शहरमा यसै बर्ष सम्पन्न विश्व क्रेडिट युनियन सम्मेलनको अवसरमा ओकूकी प्रमुख कार्यकारी अधिकृत एलिसा म्याककार्टर ला बोर्डले विश्व क्रेडिट युनियन सदस्यहरुको संख्या बढाउने जानकारी गराउनुभएको थियो । जसअनुसार कुल सदस्यमध्ये ५० प्रतिशत हिस्सा महिलाको हुनेछ । त्यति मात्र नभई ओकूले विश्वभर क्रेडिट युनियनको नेतृत्वमध्ये ५० प्रतिशत महिला भएको हेर्न चाहेको पनि एलिसाको प्रस्तुतिमा अटाएको थियो ।