एजेन्सी । भारतीय प्रधानमन्त्री नरेन्द्र मोदीले सहकारी अभियानभित्र बोलीमा एकरुपता हुनपर्ने बताउँदै एउटै आवाज सहकारिताको द्योतक भएको बताउनुभएको छ । उहाँले सँगसँगै हिड्नु र एउटै बोली बोल्नु सहकारिता भएको स्पष्ट पार्नुभयो ।

नयाँ दिल्लीमा आजबाट सुरु भएको अन्तर्राष्ट्रिय सहकारी सम्मेलन २०२४ को औपचारिक उद्घाटन गर्दै भारतीय प्रधानमन्त्री मोदीले सहकार्य, सहयोग, समन्वय, पारस्परिकताको जगमा उभिएको सहकारिताको महत्वबारे चर्चा गर्नुभएको हो । उहाँले सहकारी जीवन संस्कृति भएको बताउनुभयो ।

विश्वको लागि सहकारी एक मोडल भएपनि भारतको लागि संस्कृतिको आधार अनि जीवनशैली भएको मोदीको दाबी थियो । भारतको स्वतन्त्रता आन्दोलनलाई पनि सहकारिताले प्रेरित गरेको उहाँले बताउनुभयो । सहकारीमार्फत आर्थिक सशक्तिकरणका साथै स्वतन्त्रता सेनानीहरुलाई सामूहिक मञ्च मिलेको जीकिर प्रधानमन्त्री मोदीले गर्नुभयो । महात्मा गान्धीको ग्रामस्वराजले सामुदायिक भागेदारीलाई नयाँ उर्जा दिएको उहाँको भनाइ थियो ।

भारतीय सहकारी अभियानको बलियो प्रवक्ताका रुपमा मोदीले आफ्नो सम्बोधनमा यो क्षेत्रको अपरिहार्यता, भारतीय सहकारी अभियानको योगदान, सम्भावना र विश्व सहकारी अभियानसँग एकाकारको विषयलाई महत्वका साथ समेट्नुभएको थियो ।

भारतका सरकार प्रमुखबाट सहकारी क्षेत्रको महत्ता र गरिमालाई यो तवरले विश्व सामु प्रस्तुत गर्नुले पनि हाम्रो छिमेकी मुलुकको सहकारी अभियान किन सशक्त रहेछ भन्ने गतिलो कारण मिल्दछ । मोदीले आफ्नो सम्बोधनमा सरकार र सहकारी अभियान मिलेर मुलुकलाई समृद्ध बनाउन लागि परेको बताउनुभयो । भारतमा हाल ८ लाख सहकारी समिति छन् ।

ग्रामीण भारतको करिब ९८ प्रतिशत हिस्सालाई सहकारी क्षेत्रले समेटेको उहाँले बताउनुभयो । करिब ३० करोड भारतीयहरु सहकारी अभियानसँग जोडिएको प्रधानमन्त्री मोदीले बताउनुभयो । प्रत्येक ५ भारतीयमा एक जना सहकारी अभियानसँग जोडिएको भन्दै हर क्षेत्रमा सहकारीको उपस्थिति बलियो भएको उहाँले दाबी प्रस्तुत गर्नुभयो । यस्तै भारतमा २ लाख आवास सहकारीहरु भएको पनि उहाँले जानकारी गराउनुभयो । प्रधानमन्त्री मोदीले अमूल, इफ्कोको चर्चासँगै कृषि, उद्योग, आवास आदि विविध क्षेत्रमा सहकारीको भूमिका महत्वपूर्ण भएको उल्लेख गर्नुभयो ।

प्रधानमन्त्री मोदीले भारतमा सहकारी बैंकीङ क्षेत्रलाई पनि सुधार गरी बलियो बनाएको बताउनुभयो । १२ लाख करोड सहकारी बैंकमा जम्मा भएको भन्दै प्रधानमन्त्री मोदीले सहकारी बैंकलाई केन्द्रीय बैंक अर्थात रिजर्ब बैंक अफ इन्डिया अन्तर्गत ल्याउने, सहकारी बैंकका सदस्यहरुको ५ लाख सम्मको बचत सुरक्षण गर्ने, डिजिटल बैंकिङको बिस्तार गर्ने आदि कामहरु भएको बताउनुभयो । यस्तै, अलग्गै सहकारी मन्त्रालय गठनदेखि आवश्यक नीति तथा कानून निर्माण लगायत अनेकौं कामहरुबारे पनि प्रधानमन्त्री मोदीले आफ्नो सम्बोधनमा समेट्नुभयो । भारतमा सहकारी अभियान सशक्त भएको भन्दै सरकारले सहकारी क्षेत्रमा निक्कै धेरै सुधारहरु गरेको उहाँको भनाइ थियो ।

प्रधानमन्त्री मोदीले सन् २०२५ लाई अन्तर्राष्ट्रिय सहकारी वर्ष घोषणा गरेकोमा धन्यवाद दिनुभएको थियो ।