महोत्तरी — महोत्तरी जिल्लाको बर्दिबासमा नेफ्स्कून जनकपुर सदस्य सेवा कार्यालयको आयोजनामा “साकोस जोखिम व्यवस्थापन ३६०” विषयक कार्यशाला सम्पन्न वैशाख १७ गते भएको छ । 

सहकारी संस्थाहरूमा जोखिम व्यवस्थापन सम्बन्धी क्षमता अभिवृद्धि गर्ने उद्देश्यले आयोजित उक्त कार्यक्रममा ६ जिल्लाका सहकारीकर्मीहरूको सहभागिता रहेको थियो ।

कार्यशालामा धनुषा, महोत्तरी, सर्लाही, रौतहट, बारा तथा सप्तरी जिल्लाका सहकारी संस्थाका अध्यक्ष, सञ्चालक, उच्च व्यवस्थापन तथा कर्मचारी गरी ६७ जनाको सहभागीता रहेको थियो । कार्यशालाले सहकारी संस्थाहरूमा बढ्दो जोखिम व्यवस्थापनको आवश्यकता तथा त्यसको प्रभावकारी कार्यान्वयनका विषयमा केन्द्रित रही छलफल गरेको थियो ।

कार्यशालाको पहिलो सत्रमा नेफ्स्कूनका सहायक कार्यकारी अधिकृत दुर्गा प्रसाद ढकालले सहकारी अभियानको आगामी दिशा, स्क्यान कार्यक्रमको महत्व तथा यसको प्राविधिक पक्षबारे जानकारी गराउनुभएको थियो । उहाँले सहकारी संस्थाहरूलाई समयानुकूल व्यवस्थापन प्रणाली अपनाउनुपर्ने आवश्यकता औँल्याउनुभयो ।

त्यसैगरी दोस्रो सत्रमा नियोसिस टेक्नोलोजीका प्रमुख कार्यकारी अधिकृत  मनोज तिवारीले सहकारी संस्थाको डिजिटल रूपान्तरण तथा साइबर सुरक्षा सम्बन्धी विषयमा प्रस्तुति दिनुभएको थियो । उहाँले सूचना प्रविधिको प्रयोगसँगै साइबर जोखिम न्यूनीकरणका उपायबारे सहभागीहरूलाई जानकारी गराउनुभयो ।

कार्यशालाबाट सहकारी क्षेत्रमा देखिएका वित्तीय जोखिम, कानुनी जोखिम, सञ्चालनसम्बन्धी जोखिम तथा बजार जोखिम न्यूनीकरणका लागि सामूहिक प्रतिबद्धता व्यक्त भएको छ ।