बुटबल । नेफ्स्कूनको आयोजनामा जोखिममा आधारित आन्तरिक लेखा व्यवस्थापन सम्बन्धी दुई दिने तालिम वैशाख १७ गते सम्पन्न भएको छ ।  वैशाख १६ र १७ गते सञ्चालन भएको तालिममा सहकारी संस्थाका २८ जनाको सहभागिता रहेको थियो ।

नेफ्स्कूनका वरिष्ठ अधिकृत तथा तालिमका प्रशिक्षक कोमलराज अधिकारीले जोखिम व्यवस्थापनको अवधारणा, जोखिम पहिचान तथा मूल्याङ्कन प्रक्रिया, आन्तरिक नियन्त्रण प्रणाली, लेखा परीक्षणका आधारभूत पक्षहरू लगायतका विषयमा स्पष्ट र व्यवस्थित रूपमा सहजीकरण गर्नुभएको थियो । सहभागीहरूलाई व्यवहारिक अभ्यास, समूह छलफल तथा केस स्टडीमार्फत सिकाइलाई अझ प्रभावकारी बनाइएको थियो । तालिम अवधिभर सहभागीहरूले आफ्ना संस्थामा देखिएका जोखिमका उदाहरणहरू प्रस्तुत गर्दै समाधानका उपायहरूबारे अनुभव आदानप्रदान गरेका थिए । यसले सिकाइलाई अझ व्यवहारमुखी र उपयोगी बनाएको थियो । 

कार्यक्रमको समापन सत्रमा प्रशिक्षकले जोखिममा आधारित आन्तरिक लेखा व्यवस्थापनको महत्वमा जोड दिँदै सिकेका ज्ञान तथा सीपलाई व्यवहारमा कार्यान्वयन गर्न आग्रह गर्नुभयो । तालिमले संस्थामा सुशासन, पारदर्शिता तथा उत्तरदायित्व अभिवृद्धि गर्न महत्वपूर्ण भूमिका खेल्ने विश्वास व्यक्त गरिएको छ । तालिम व्यवस्थापन रुपन्देही सदस्य सेवा कार्यालय प्रमुख कल्पना भण्डारी र कार्यालय सहायक प्रेम प्रसाद अधिकारीले गर्नुभएको थियो ।