काठमाडौं । राष्ट्रिय सहकारी नियमन प्राधिकरण ले बचत तथा ऋणको कारोबार गर्ने सहकारी संस्थाहरूलाई सञ्चालन अनुमति प्राप्त गर्न आवेदन दिने म्याद थप गरेको छ ।

प्राधिकरणद्वारा जारी सूचनाअनुसार कुल कारोबारको ५० प्रतिशतभन्दा बढी बचत तथा ऋणको कारोबार गर्ने वा २५ करोड रुपैयाँभन्दा बढी वित्तीय कारोबार भएका सहकारी संस्थाले अनिवार्य रूपमा सञ्चालन अनुमति लिनुपर्ने व्यवस्था गरिएको छ ।

सूचनामा सञ्चालन अनुमति सम्बन्धी आवेदन प्रक्रिया २०८३ साल जेठ ७ गतेदेखि सुरु भएको र  आवेदन पेश गर्ने अन्तिम मिति २०८३ असार मसान्तसम्म कायम गरिएको जनाएको छ ।

प्राधिकरणले सहकारी (पहिलो संशोधन) अध्यादेश, २०८३ तथा प्राधिकरणको निर्णय एवं निर्देशन बमोजिम उक्त व्यवस्था कार्यान्वयनमा ल्याइएको स्पष्ट पारेको छ । साथै सम्बन्धित सहकारी संस्थाहरूलाई तोकिएको समयभित्र आवश्यक कागजात सहित आवेदन प्रक्रिया पूरा गर्न आग्रह गरिएको छ ।

बचत तथा ऋण सहकारी क्षेत्रलाई थप व्यवस्थित, पारदर्शी र उत्तरदायी बनाउने उद्देश्य सहित प्राधिकरणले पछिल्लो समय दर्ता, अभिलेखीकरण, अनुगमन तथा नियमनका मापदण्डलाई प्रभावकारी रूपमा कार्यान्वयन गर्दै आएको छ । सञ्चालन अनुमति प्रक्रियालाई पनि सहकारी क्षेत्रको सुशासन र वित्तीय अनुशासन सुदृढ गर्ने कदमका रूपमा हेरिएको छ ।

थप जानकारीका लागि प्राधिकरणले सहकारी (पहिलो संशोधन) अध्यादेश, २०८३ अध्ययन गर्न सम्बन्धित संस्थाहरूलाई अनुरोध गरेको छ ।