काठमाडौं । सन्दर्भ ब्याजदर निर्धारण समितिको भोलि विभागमा बस्ने बैठकमा अभियानको तर्फबाट साझा धारणा पेश गरिने भएको छ । सन्दर्भ ब्याजदर पुनरावलोकनका सम्बन्धमा पुनः आज  राष्ट्रिय सहकारी महासंघको अगुवाइमा महासंघको सभाहलमा केन्द्रीय तथा विषयगत जिल्ला संघहरुसँग विस्तृत परामर्श बैठक बसेको थियो ।  छलफलबाट भोलि दिउसो १ बजे विभागमा बस्ने ब्याजदर निर्धारण समितिको बैठकमा अभियानको तर्फबाट साझा धारणा प्रस्तुत गर्ने निर्णय भएको नेफ्स्कूनका अध्यक्ष परितोष पौड्यालले जानकारी दिनुभयो ।

सहकारीको सन्दर्भ व्याजदर पुनरावलोनका सम्बन्धमा महासंघको अगुवाईमा फागुन २ गतेदेखि अर्थ मन्त्रालय, सहकारी मन्त्रालय र विभागमा बारम्बार छलफल तथा अन्तरक्रिया भइरहेको छ । महासंघका अध्यक्ष मिनराज कडेलको नेतृत्वमा राष्ट्रिय सहकारी बैंक, विषयगत केन्द्रीय संघ र जिल्ला संघका  प्रतिनिधिहरुद्वारा सन्दर्भ ब्याजदर पुनराबलोकनका लागि सुझाव पेश गरेको भएपनि हालसम्म विभागले समस्या समाधानका लागि भने पहल गरेको देखिएको छैन ।