रुपन्देही — नेपाल बचत तथा ऋण केन्द्रीय सहकारी संघ लि. (नेफ्स्कून) र रुपन्देही स्थित तीन सहकारी संस्थाबीच व्यवसाय विकास सेवा (बिडिएस) कार्यक्रम सञ्चालनसम्बन्धी सम्झौता माघ २८ गते सम्पन्न भएको छ।

सम्झौतामा नमुना महिला विकास बचत तथा ऋण सहकारी संस्था लिमिटेड, सेमलार बचत तथा ऋण सहकारी संस्था लिमिटेड तथा तिलोत्तमा–कोटिहवा स्थित जनउत्थान बचत तथा ऋण सहकारी संस्था लिमिटेड रहेका छन्।

व्यवसाय विकास सेवा (बिडिएस) कार्यक्रम मार्फत सहकारी सदस्यहरूलाई व्यवसायिक परामर्श, वित्तीय पहुँच र बजार सञ्जालमा प्राविधिक सहजीकरण प्रदान गरी दिगो तथा सफल उद्यमी बनाउने लक्ष्य राखिएको छ। यस कार्यक्रमले उत्पादनदेखि उपभोक्तासम्म तथा सेवादेखि ग्राहकसम्मको सम्पूर्ण प्रक्रियामा प्राविधिक तथा समन्वयात्मक सहयोग पुर्‍याउने उद्देश्य लिएको छ।

हाल सहकारी संस्थाहरूमा भाखा नाघेको ऋण प्रमुख चुनौतीका रूपमा देखिएको छ। बिडिएस कार्यक्रमले सदस्यहरूको लगानीलाई उत्पादक, व्यवसायिक र नतिजामूलक बनाउँदै ऋणको समयमै भुक्तानी सुनिश्चित गर्न सहयोग गर्ने अपेक्षा गरिएको छ।

सम्झौता कार्यक्रममा सम्बन्धित साकोसका सञ्चालक तथा व्यवस्थापन प्रतिनिधिहरूको उपस्थिति रहेको थियो। नेफ्स्कूनका तर्फबाट प्रमुख कार्यकारी अधिकृत डा. शिवजी सापकोटा, वरिष्ठ अधिकृत कोमलराज अधिकारी तथा रुपन्देही सदस्य सेवा कार्यालय प्रमुख कल्पना भण्डारीको उपस्थिति रहेको थियो ।  

यसैबीच, सदस्य संस्था निष्ठा बचत तथा ऋण सहकारी संस्था लि. (छपिया), समिप बचत तथा ऋण सहकारी संस्था लि. (सुद्धोधन) र सुद्धोधन बचत तथा ऋण सहकारी संस्था लि. (सुद्धोधन) का सञ्चालक समिति तथा व्यवस्थापनसँग नेफ्स्कूनका प्रमुख कार्यकारी अधिकृत सहितको टोलीले भेटघाट गरेको छ। यसैक्रममा सहकारीहरूको वर्तमान अवस्था, चुनौती तथा दिगो र सदस्य–केन्द्रित रूपमा सुरक्षित सञ्चालनका लागि आवश्यक नियमन र कानुनी अनुपालनका विषयमा छलफल भएको थियो ।