दाङ । नेपाल बचत तथा ऋण केन्द्रीय सहकारी संघ लि. (नेफ्स्कून) सदस्य सेवा केन्द्र, घोराही, दाङको आयोजनामा ऋण असुली कार्यविधि निर्माण तालिम वैशाख १६ गते सम्पन्न भएको छ । 

वैशाख १५ र १६ गते सञ्चालित तालिमको समापन कार्यक्रममा दाङ जिल्ला बचत तथा ऋण सहकारी संघका उपाध्यक्ष भगवती शर्माको अध्यक्षतामा सम्पन्न भएको थियो । तालिममा दाङ, प्यूठान, अर्घाखाँची र सल्यानका विभिन्न साकोसका अध्यक्ष, उपाध्यक्ष,  सचिव, कोषाध्यक्ष, सञ्चालक समिति सदस्य व्यवस्थापक, ऋण उपसमिति संयोजक, ऋण शाखा प्रमुख र लेखापाल गरी जम्मा  ४१ जनाको सहभागिता रहेको थियो । 

तालिमको सहजीकरण नेफ्स्कूनका सहायक कार्यकारी अधिकृत गणेश प्रसाद तिमल्सिनाले गर्नुभएको थियो । तालिमको सहजीकरणमा प्रशिक्षक गणेश प्रसाद तिमल्सिनाले तालिममा सहकारीको ऋण असुली सम्बन्धी अवधारणा र कानुनी आधारहरु, कार्यविधिको ढाँचा र निर्माणका चरणहरु, कार्यविधिका उद्देश्य तथा कार्यहरु, ऋण असुली ताकेता प्रक्रिया, आंशिक धितो फुकुवा तथा म्याद थप सम्बन्धी व्यवस्था, ऋण अपलेखन सम्बन्धी प्रक्रिया तथा अन्य आवश्यक कागजात व्यवस्थापन र अनुसुचीहरुका विषयमा प्रशिक्षण गर्नुभएको थियो ।

तालिममा उपस्थित सहभागिहरु मध्ये पुरनठाँटी साकोसका ऋण उप समिति संयोजक बसन्ता भुसाल र हातेमालो साकोसका व्यवस्थापक सुरेश पौडेलले मन्तव्य राख्नु भएको थियो । मन्तव्यमा दुई दिने तालिमबाट ऋण असुली, लगानी गर्दा ध्यानदिनुपर्ने कुराहरु, कानुनी प्रावधानका विषय, अनुसूचिहरुका विषयमा प्रष्ट रुपमा जानकारी भएको बताउनु भयो । कार्यक्रमको सञ्चालन नेफ्स्कून दाङ सदस्य सेवा केन्द्रका ईन्चार्ज चन्द्रदेव जोशीले गर्नु भएको थियो भने आवश्यक व्यवस्थापन दिनेश महराले गर्नु भएको थियो ।