काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) ले नयाँ बानेश्वर स्थित अल्फा हाउसमा आयोजना गरेको ACCESs परामर्श कार्यशाला जेष्ठ ०८ गते सम्पन्न भएको छ । 

सहकारी क्षेत्रको संस्थागत विकास, सुशासन र गुणस्तर सुनिश्चिततामा केन्द्रित उक्त कार्यशालामा देशभरका विभिन्न बचत तथा ऋण सहकारी संस्थाका उच्च व्यवस्थापन तहका कर्मचारीहरूको उपस्थिति रहेको थियो ।

कार्यशालाको उद्घाटन नेफ्स्कूनका अध्यक्ष चन्द्रप्रसाद ढकालले दीप प्रज्वलनमार्फत गर्नुभएको थियो । उद्घाटन पश्चात उहाँले सहकारी अभियानले भोगिरहेको पछिल्लो चुनौतीपूर्ण अवस्थालाई चिर्दै अभियानलाई पुनः सुदृढ, व्यवस्थित र विश्वासयोग्य दिशामा फर्काउने प्रतिबद्धता व्यक्त गर्नुभयो ।

विगतका जटिल परिस्थितिहरूलाई स्मरण गर्दै ती चुनौतीबीच पनि सहकारी अभियान अहिले नयाँ ऊर्जा र आत्मविश्वासका साथ मूल साखमा फर्किने चरणमा प्रवेश गरेको बताउनुभयो । हाल करिब ६०० संस्थाहरू नेफ्स्कूनका गुणस्तर सुनिश्चितता कार्यक्रमहरूमा आबद्ध भई सहकार्य गरिरहेको उल्लेख गर्दै उहाँले स्तरीकरण र सुशासनलाई संस्थागत सुधारको आधारका रूपमा लिनुपर्नेमा जोड दिनुभयो ।

अध्यक्ष ढकालका अनुसार नेफ्स्कूनको ३७ वर्ष लामो प्रयास र एमआईएस प्रणालीमार्फत तथ्याङ्क संकलन तथा पारदर्शितामा उल्लेखनीय सुधार भएको छ । बजारमा अस्वस्थ प्रतिस्पर्धा बढिरहेको अवस्थामा नेफ्स्कूनले गुणस्तर मापन र सुशासनलाई प्राथमिकता दिएको थियो । नियामक निकाय र स्थानीय सरकारसँगको प्रभावकारी समन्वय अपरिहार्य रहेको उल्लेख गर्दै सहकारी क्षेत्रलाई दिगो र सुरक्षित बनाउन सबै पक्षको सहकार्य आवश्यक रहेको बताउनुभयो । साथै, राष्ट्रिय सहकारी नियमन प्राधिकरणको दायरामा आएका संस्थाहरूलाई समेत आगामी नीतिगत संरचनामा समेट्ने तयारी भइरहेको जानकारी दिनुभयो ।

कार्यक्रममा नेफ्स्कूनका प्रमुख कार्यकारी अधिकृत डा. शिवजी सापकोटाले स्वागत मन्तव्य राख्दै सहकारी संस्थाहरूको संस्थागत विकास, सुशासन र गुणस्तर सुनिश्चिततामा केन्द्रित यस कार्यशालाको उद्देश्य स्पष्ट पार्नुभयो ।

उहाँले एसियाली ऋण महासंघ (ACCU)  सँगको सहकार्य सन् १९९२ देखि निरन्तर रहँदै आएको उल्लेख गर्दै ACCESS कार्यक्रम, नेतृत्व विकास, प्रोफेशनलाइजेसन, नेटवर्क व्यवस्थापन तथा गुणस्तर सुनिश्चितता प्रणालीले सहकारी क्षेत्रलाई व्यावसायिक, सुरक्षित र अन्तर्राष्ट्रिय मापदण्ड अनुकूल बनाउन महत्वपूर्ण योगदान दिएको बताउनुभयो ।

प्रमुख कार्यकारी अधिकृत सापकोटाका अनुसार सन् १९९६/९७ देखि सुरु भएका सहकारी विकास कार्यक्रमहरूले नीति निर्माण, रणनीतिक योजना, सुशासन अभ्यास तथा संस्थागत प्रणाली विकासमा महत्वपूर्ण आधार तयार गरेका थिए । त्यसैगरी कर्मचारी व्यवस्थापन, बोर्ड बैठक अभिलेखीकरण, प्रतिवेदन प्रणाली तथा नियामकीय रिपोर्टिङजस्ता अभ्यासलाई संस्थागत बनाउने काम “प्रोफेशनलाइजेसन” मार्फत अघि बढाइएको उहाँले बताउनुभयो ।

सन् २००६ पछि ACCESS गुणस्तर सुनिश्चितता कार्यक्रम मार्फत नेपाली सहकारी संस्थाहरू अझ व्यावसायिक, सुरक्षित र अनुशासित बनेको उल्लेख गर्दै त्यसकै अनुभवका आधारमा नेपालले आफ्नै “प्रोभिजन” कार्यक्रम विकास गरेको जानकारी दिनुभयो । नेटवर्क व्यवस्थापन प्रणालीले नीति, कार्यविधि र सञ्चालन अभ्यासमा एकरूपता ल्याउन सहयोग गरेको उहाँको भनाइ थियो ।

साथै, हालको नियामकीय वातावरणलाई अवसरका रूपमा उपयोग गर्दै सहकारी संस्थाहरूलाई समुदायस्तरका प्रतिस्पर्धी वित्तीय संस्थाका रूपमा विकास गर्नुपर्ने आवश्यकता रहेको औँल्याउनुभयो ।

कार्यशालामा ACCU का प्रमुख कार्यकारी अधिकृत एलिनिता भि स्यान रोके (लेनी) तथा वरिष्ठ प्राविधिक अधिकृत रञ्जिथ हेतियाराचीले प्रमुख सहजकर्ताको रूपमा प्रशिक्षण प्रदान गर्नुभएको थियो । नेफ्स्कूनका विभागीय प्रमुख दुर्गा प्रसाद ढकाल र वरिष्ठ अधिकृत प्रेमनाथ वाग्लेले सहजीकरण गर्नुभएको थियो । कार्यशालामा विभिन्न साकोसका प्रमुख कार्यकारी अधिकृत,उच्च व्यवस्थापन तथा  कर्मचारीहरू गरी ५५ जनाको सहभागिता रहेको थियो।