काठमाडौं । जिल्ला सहकारी संघ लि., ललितपुरले आगामी कार्यदिशा तय गर्ने उद्देश्यसहित रणनीतिक व्यवसायिक योजना तर्जुमा गोष्ठी सञ्चालन गरेको छ ।

नेपाल बचत तथा ऋण केन्द्रीय सहकारी संघ लि. (नेफ्स्कून) को प्राविधिक सहजीकरणमा सञ्चालित गोष्ठीमा संघका सञ्चालक समिति, लेखा सुपरिवेक्षण समिति तथा व्यवस्थापनका १४ जनाको सहभागिता रहेको थियो ।

गोष्ठीले नियामकीय अनुकूलनलाई रणनीतिक योजनाको मुख्य प्राथमिकतामा राख्दै नीति बहस तथा पैरवी, सदस्य संघ/संस्थाको नियामकीय क्षमता अभिवृद्धि तथा सहकारी अभियानलाई थप प्रभावकारी बनाउन संघको प्राविधिक क्षमता विकासमा जोड दिएको छ ।

योजना अन्तर्गत ‘फिट एन्ड प्रपर’ मापदण्डको कार्यान्वयन, सम्पत्ति शुद्धीकरण तथा आतङ्ककारी क्रियाकलापमा वित्तीय लगानी निवारणसम्बन्धी व्यवस्थाको प्रभावकारी पालनाका लागि सदस्य संघ/संस्थाको क्षमता विकास गर्ने, स्थानीय सरकार तथा अन्य सरोकारवालासँग समन्वय विस्तार गर्ने तथा संघलाई स्रोत केन्द्र (Resource Center) का रूपमा विकास गर्ने लक्ष्य तय गरिएको छ ।

संघका अध्यक्ष जगतलाल महर्जनले चुनौतीपूर्ण परिस्थितिका बाबजुद संघले सदस्य संघ/संस्थालाई निरन्तर सहजीकरण गर्दै आफ्नो विश्वसनीयता कायम राख्न सफल भएको बताउनुभएको थियो । उहाँले सहकारी क्षेत्रलाई थप व्यवस्थित, पारदर्शी र उत्तरदायी बनाउन आवश्यक नियामकीय व्यवस्थाको प्रभावकारी कार्यान्वयनमा संघले सदस्य संस्थासँग सहकार्य गर्ने र अभियानका हितविपरीत देखिएका नीतिगत विषयमा आवश्यक बहस तथा पैरवीलाई निरन्तरता दिने बताउनुभयो ।

संघका सचिव अनिलबीर बज्राचार्यले जिल्ला सहकारी संघलाई स्रोत केन्द्रका रूपमा विकास गर्दै सदस्य संस्थालाई गुणस्तरीय प्राविधिक सेवा उपलब्ध गराउने अवसरको अधिकतम उपयोग गरिने उल्लेख गर्नुभएको थियो । 

दुईदिने रणनीतिक व्यवसायिक योजना तर्जुमा गोष्ठी साउन २ र ३ गते सिन्धुपाल्चोकको भोटेचौरमा सम्पन्न भएको थियो । गोष्ठीको सहजीकरण नेफ्स्कूनका वरिष्ठ अधिकृत प्रेमनाथ वाग्लेले गर्नुभएको थियो ।