बुटवल, रुपन्देही — नेपाल बचत तथा ऋण केन्द्रीय सहकारी संघ लिमिटेड (नेफस्कून) को रुपन्देही सदस्य सेवा कार्यालयको आयोजनामा “समसामयिक विषयमा अन्तरक्रियात्मक कार्यक्रम” सम्पन्न भएको छ ।

कार्यक्रममा नेफस्कूनका अध्यक्ष चन्द्रप्रसाद ढकाल, लुम्बिनी प्रोस्कूनका कार्यवाहक अध्यक्ष ऋषीराम सापकोटा, रुपन्देही जिल्ला बचत संघका अध्यक्ष बसन्तप्रसाद ढकाल तथा जिल्लाका १५ वटा बचत तथा ऋण सहकारी संस्थाका अध्यक्षहरूको उपस्थिति रहेको थियो ।

कार्यक्रमको सुरुआत गर्दै नेफस्कूनका वरिष्ठ अधिकृत कोमल राज अधिकारीले नेफस्कूनको हालको वित्तीय तथा गैरवित्तीय अवस्था, संस्थागत प्रगति, सदस्य संस्थाहरूको अनुगमन अवस्था र चालु आर्थिक वर्षका उपलब्धिहरूबारे विस्तृत जानकारी प्रस्तुत गर्नुभएको थियो । 

सहभागी सहकारी संस्थाका अध्यक्षहरूले राखेका विभिन्न प्रश्न तथा जिज्ञासाहरूको उत्तर दिँदै नेफस्कून अध्यक्ष चन्द्रप्रसाद ढकालले बचत तथा ऋण सहकारी क्षेत्रमा देखिएका वर्तमान चुनौती र समाधानका उपायहरूमा प्रकाश पार्नुभयो । उहाँले ऋण असुलीका समस्या समाधान गर्न संस्थाहरूले व्यवस्थित असुली योजना बनाउनुपर्ने र रजिस्ट्रार कार्यालयले जारी गरेका निर्देशनहरूको प्रभावकारी कार्यान्वयन गर्नुपर्नेमा जोड दिनुभयो । साथै, गैरबैंकिङ सम्पत्तिको उचित व्यवस्थापनका लागि समयमै ठोस कदम चाल्नुपर्ने र  हालैको नियामक परिवर्तनको सन्दर्भमा राष्ट्रिय सहकारी नियमन प्राधिकरणसँग संघहरू र प्राथमिक संस्थाहरूले सहकार्यात्मक भूमिका निर्वाह गर्नुपर्ने बताउनुभयो । “सदस्य संस्थाहरूले अनुभूति गर्ने गरी संघहरूले प्राथमिक संस्थाहरूको स्थायित्व, सुदृढीकरण र स्तरीकरणमा कार्य गर्नुपर्ने बताउनुभयो । 

नेपाल सरकारको कानुनी व्यवस्थाअनुसार अभियानको वित्तीय कारोबार व्यवस्थापन गर्न सहकारी बैंक स्थापनाको प्रक्रिया अघि बढाइएको जानकारी दिँदै अध्यक्ष ढकालले प्राथमिक सहकारी संस्थाहरूलाई यस बैंक स्थापनामा आवश्यक सहयोग र सक्रिय साथ दिन अपील गर्नुभयो ।

कार्यक्रममा उपस्थित बचत तथा ऋण सहकारीका अध्यक्षहरूले नेफस्कूनको यस पहललाई सकारात्मक रूपमा स्वागत गर्दै आ–आफ्नो संस्थाका तर्फबाट यथासम्भव सहयोग प्रदान गर्ने प्रतिबद्धता जनाएका छन् ।