धादिङ । ज्वालामुखी गाउँपालिका ६, साध भञ्ज्याङ धादिङमा कृषि व्यवसायलाई व्यावसायिक तथा दिगो बनाउन कृषक व्यवसाय खेल तालिम सञ्चालन भएको छ । 

संगम आयआर्जन बचत तथा ऋण सहकारी संस्था लिमिटेडको आयोजना तथा नेपाल बचत तथा ऋण केन्द्रीय सहकारी संघ लि. (नेफ्स्कून) र DSIK, Germany को प्राविधिक सहयोगमा कार्यक्रम सञ्चालन भएको हो । संगम आयआर्जन साकोसका अध्यक्ष गंगा बहादुर अधिकारी (ध्रुव) को अध्यक्षतामा असोज ०२ गतेदेखि ०४ गतेसम्म तिन दिनसम्म कार्यक्रम सञ्चालन भएको थियो ।

साकोसका सचिव चन्द्रमान किसान ले सञ्चालन गर्नुभएको कार्यक्रमका प्रमुख अतिथि ज्वालामुखी गाउँपालिका, धादिङका उपप्रमुख धर्म बहादुर अर्याल र ज्ञानु कडेल ज्वालामुखी गाउँपालिका, सरकारी विभाग प्रमुखको उपस्थिति रहेको थियो ।

कार्यक्रममा मन्तव्य राख्दै सहकारी संस्थाका अध्यक्ष गंगा बहादुर अधिकारीले संस्थाका सदस्यहरूलाई कृषिमा व्यवसायीकरण तर्फ उन्मुख गराउने कार्यक्रमको मुख्य उद्देश्य रहेको बताउनुभयो । संस्थाका सदस्यहरूले वार्षिक रूपमा करिब ६० लाख रुपैयाँ बराबरको सखरखण्ड, २० लाख रुपैयाँ बराबरको एभोकाडो तथा अकबरे खुर्सानी लगायतका कृषि उपज उत्पादन तथा निकासी गर्दै आएको बताउनु भयो । प्रमुख अतिथि उपप्रमुख धर्म अर्यालले ज्वालामुखी गाउँपालिकाले आफ्ना सदस्य तथा कृषकहरूलाई कृषि मार्फत आर्थिक रूपमा सबल र समृद्ध बनाउने लक्ष्य लिएको बताउनुभयो । कृषिक्षेत्रमा रहेका समस्याको पहिचान गरी उचित लगानी र सही निर्णयमार्फत कृषि व्यवसायलाई दिगो बनाउनुपर्ने उहाँको भनाइ थियो ।

उहाँले अनुदान प्राप्तिका लागि मात्र प्रतिस्पर्धा गर्ने प्रवृत्ति भन्दा प्राप्त अनुदानको दीर्घकालीन तथा प्रभावकारी सदुपयोगमा ध्यान दिनुपर्नेमा जोड दिनुभयो । ज्वालामुखी गाउँपालिका कृषि उत्पादनका दृष्टिले सम्भावना युक्त क्षेत्र रहेको उल्लेख गर्दै एभोकाडो, कफी, सखरखण्ड तथा पशुपालनतर्फ बाख्रा, गाई, भैंसी र घाँस उत्पादनमा आत्मनिर्भर हुँदै उत्पादित वस्तुको बिक्री तथा निकासी समेत भइरहेको बताउनुभयो ।

गाउँपालिकाले सम्भावित कृषि गतिविधिमा आवश्यक सहयोग र सहकार्य गर्ने प्रतिबद्धता व्यक्त गर्दै उपप्रमुख अर्यालले कुनै पनि कृषि व्यवसाय सुरु गर्नुअघि त्यस सम्बन्धी आधारभूत ज्ञान तथा सीप हासिल गर्न आवश्यक रहेको बताउनुभयो । प्रस्तुत कार्यक्रमबाट सहभागीहरूले उक्त ज्ञान र व्यावहारिक सीप प्राप्त गर्ने अपेक्षा व्यक्त गरेका थिए । 

कार्यक्रममा संघका अधिकृत खिलनाथ लुइटेल र राजेश खड्का ले सहजीकरण गर्नुभएको थियो भने तालिम कार्यक्रमको औचित्यमाथि संघका अधिकृत खिलनाथ लुइटेलले प्रकाश पार्नुभएको थियो । तालिमका सहभागी मानबहादुर शाक्य गुभाजु ले कार्यक्रम अत्यन्तै सौहार्दपूर्ण वातावरणमा सम्पन्न भएको र सहभागीहरूको सक्रिय सहभागिता रहेको बताउनुभयो । अन्य परम्परागत तालिम भन्दा फरक रूपमा कार्यक्रमलाई व्यावहारिक तथा प्रयोगात्मक आधारमा तालिम कार्यक्रम रहेको उहाँको भनाइ थियो ।

कृषि पेशामा संलग्न व्यक्तिहरूका लागि मात्र नभई जुनसुकै पेशा तथा व्यवसायमा आबद्ध व्यक्तिका लागि पनि तालिममा सिकाइएका हिसाब–किताब तथा आर्थिक व्यवस्थापनका विषयहरू महत्वपूर्ण रहेको बताउनुभयो । आम्दानी तथा खर्चको नियमित हिसाब–किताब राख्ने र पैसाको उचित व्यवस्थापन गर्ने बानीले जीवन तथा व्यवसायमा आइपर्ने विभिन्न समस्याको समाधान गर्न सहज हुने बताउनुभयो ।