बेलबारी, मोरङ, १४ कात्तिक। नेपाल बचत तथा ऋण केन्द्रीय सहकारी संघ लि. (नेफ्स्कून) को सहभागितामा मोरङको बेलबारीमा बचत तथा ऋण सहकारी संघहरूको दिगो सञ्चालन, वित्तीय कारोबार व्यवस्थापन तथा आगामी भूमिकासम्बन्धी अन्तरक्रिया कार्यक्रम सम्पन्न भएको छ।

जिल्ला बचत तथा ऋण सहकारी संघ लि. मोरङको सभाहलमा आयोजित कार्यक्रममा सहकारी ऐन, नियम, मापदण्ड तथा नियामकीय निर्देशनका आधारमा बचत संघहरूको सञ्चालन र व्यवस्थापन, संस्थागत स्थायित्व, वित्तीय कारोबारको व्यवस्थापन तथा बदलिँदो परिस्थितिमा संघहरूको भावी भूमिकाका विषयमा छलफल गरिएको थियो। कार्यक्रममा विभिन्न सरोकारवाला निकाय तथा बचत तथा ऋण सहकारी संघ–संस्थाका करिब ७० जना प्रतिनिधिहरूको सहभागिता रहेको थियो।

जिल्ला बचत तथा ऋण सहकारी संघ मोरङका अध्यक्ष प्रेमप्रकाश कोइरालाको अध्यक्षतामा सम्पन्न कार्यक्रममा नेफ्स्कूनका अध्यक्ष चन्द्र प्रसाद ढकाल प्रमुख अतिथि रहनुभएको थियो। कार्यक्रममा नेफ्स्कूनका सञ्चालक सदस्य शालिग्राम ढकाल तथा प्रमुख कार्यकारी अधिकृत डा. शिवजी सापकोटाको समेत उपस्थिति रहेको थियो।

मोरङको बेलबारीमा आयोजित अन्तरक्रिया कार्यक्रममा सहभागी प्रतिनिधिहरू।

बचत संघहरूको सञ्चालन र व्यवस्थापनमा नीतिगत स्पष्टताको आवश्यकता

कार्यक्रममा नेफ्स्कूनका प्रमुख कार्यकारी अधिकृत डा. शिवजी सापकोटाले विद्यमान सहकारी ऐन, नियम, मापदण्ड तथा निर्देशनका आधारमा बचत संघहरूको सञ्चालन तथा व्यवस्थापनसम्बन्धी विषयवस्तु प्रस्तुत गर्नुभएको थियो।

उहाँले बचत संघहरूको सञ्चालनमा लागू हुने कानुनी तथा नियामकीय व्यवस्थाका विषयमा जानकारी गराउँदै संघहरूको कार्यक्षेत्र, सञ्चालन व्यवस्थापन र संस्थागत भूमिकासम्बन्धी विषयमा सहजीकरण गर्नुभएको थियो।

छलफलमा सहकारी संघहरूको संस्थागत क्षमता, सदस्य संस्थाहरूको आवश्यकता, सञ्चालन व्यवस्थापन तथा वित्तीय कारोबारसँग सम्बन्धित विषयहरूलाई प्राथमिकतामा राखिएको थियो।

संघहरूको सुझावका आधारमा केन्द्रीय संघ अघि बढ्ने : अध्यक्ष ढकाल

कार्यक्रमका प्रमुख अतिथि एवं नेफ्स्कूनका अध्यक्ष चन्द्र प्रसाद ढकालले बचत संघहरूको दिगो सञ्चालन, वित्तीय कारोबार व्यवस्थापन तथा आगामी भूमिकाका विषयमा आफ्नो धारणा राख्नुभएको थियो।

उहाँले विद्यमान कानुनी तथा नियामकीय व्यवस्थाको सन्दर्भमा बचत संघहरूको सञ्चालनलाई कसरी व्यवस्थित गर्ने, संघहरूको संस्थागत स्थायित्व कसरी सुनिश्चित गर्ने तथा केन्द्रीय संघले आगामी दिनमा कस्तो भूमिका निर्वाह गर्ने भन्ने विषयमा सरोकारवालाबीच साझा धारणा निर्माण आवश्यक रहेको बताउनुभयो।

अध्यक्ष ढकालले प्रदेश तथा जिल्ला बचत संघहरूको अनुभव, सुझाव र पृष्ठपोषणलाई महत्व दिँदै संघहरूको भावी कार्यदिशा तय गर्नुपर्नेमा जोड दिनुभयो। उहाँले सहभागी संघहरूलाई आफ्ना समस्या, सम्भावना तथा आगामी भूमिकासम्बन्धी ठोस सुझाव प्रस्तुत गर्न आग्रह गर्दै प्राप्त सुझावका आधारमा केन्द्रीय संघले आगामी प्रक्रिया अघि बढाउने प्रतिबद्धता व्यक्त गर्नुभयो।

बचत तथा ऋण सहकारी अभियानको संस्थागत विकास, सदस्य संस्थाहरूको संरक्षण तथा संघहरूबीचको सहकार्यलाई थप सुदृढ बनाउने विषयमा समेत छलफल केन्द्रित रहेको थियो।

बचत संघहरूको सञ्चालन, व्यवस्थापन र आगामी भूमिकाका विषयमा छलफल।

सरोकारवालाका जिज्ञासामाथि नीतिगत तथा व्यवस्थापकीय सम्बोधन

अन्तरक्रियाका क्रममा सहभागी सरोकारवाला निकाय तथा सहकारी संघ–संस्थाका प्रतिनिधिहरूले बचत संघहरूको सञ्चालन, वित्तीय कारोबार व्यवस्थापन, कानुनी तथा नियामकीय व्यवस्था र आगामी भूमिकासम्बन्धी विषयमा जिज्ञासा तथा सुझावहरू प्रस्तुत गरेका थिए।

सहभागीहरूबाट उठाइएका व्यवस्थापकीय विषयका जिज्ञासामाथि नेफ्स्कूनका प्रमुख कार्यकारी अधिकृत डा. शिवजी सापकोटाले स्पष्ट पार्नुभएको थियो भने नीतिगत विषयमा अध्यक्ष चन्द्र प्रसाद ढकालले आफ्ना धारणा राख्नुभएको थियो।

नेफ्स्कूनले यसअघि लुम्बिनी तथा मधेश प्रदेशका बचत संघहरूसँग समेत संघहरूको आत्मनिर्भरता, संस्थागत स्थायित्व, सदस्यकेन्द्रित सेवा, वित्तीय व्यवस्थापन तथा भावी भूमिकाका विषयमा परामर्श अघि बढाएको थियो। मोरङमा सम्पन्न अन्तरक्रियालाई पनि प्रदेश तथा जिल्ला बचत संघहरूको अनुभव र सुझाव संकलन गर्दै साझा धारणा निर्माण गर्ने प्रयासको निरन्तरताका रूपमा लिइएको छ।

जिल्ला बचत तथा ऋण सहकारी संघ मोरङका अध्यक्ष प्रेमप्रकाश कोइरालाले स्वागत मन्तव्य राख्नुभएको कार्यक्रममा संघका सचिव जीवन बस्नेतले कार्यक्रम सञ्चालन गर्नुभएको थियो।

कार्यक्रमको व्यवस्थापनमा जिल्ला बचत तथा ऋण सहकारी संघ मोरङका व्यवस्थापक केदारनाथ दुलाल तथा कार्यक्रम अधिकृत रामकुमार दाहाल र नेफ्स्कूनका तर्फबाट कर्मचारीद्वय लक्ष्मण अधिकारी तथा रामहरि भट्टराईले सहजीकरण गर्नुभएको थियो।