काठमाडौं । राष्ट्रिय सहकारी महासंघ र काठमाडांै विश्वविद्यालयबीच डिप्लोमा इन को–अपरेटिभ म्यानेजमेन्ट कोर्ष सञ्चालन गर्ने सम्बन्धमा आज दिपक्षीय सम्झौता भएको छ । काठमाडौं विश्वविद्यालयका विज्ञ प्राध्यापकहरुद्वारा सञ्चालन गरिने उक्त कोर्षको पठाई २०७९ पुस १ गतेबाट शुरु हुने महासंघले जनाएको छ । 

शुक्रबार महासंघका महाप्रबन्धक चित्राकुमारी थाम्सुहाङ सुब्बा र काठमाडौं विश्वविद्यालय स्कुल अफ म्यानेजमेन्टका डिन प्रा.डा. देवी विडारीले सम्झौता पत्रमा हस्ताक्षर गर्नुभएको थियो । सम्झौता अनुसार काठमाडौं विश्वविद्यालयले विश्वविद्यालयको सिकाई अध्यापन शास्त्रमा आधारित कार्यक्रम पद्धतिलाई अनुशरण गरेर कोर्ष सञ्चालन गर्ने जनाएको छ । 

सहकारी संघ÷संस्थाहरुमा आवश्यक दक्ष र प्रतिस्पर्धी जनशक्ति उत्पादन गरी अब्बल रुपमा सञ्चालन गर्नका लागि यो कोर्ष कोशेढुङ्गा सावित हुने महासंघकी महाप्रबन्धक सुब्बाले जानकारी गराउनुभयो । उहाँले यस अघि नेपालबाट सहकारीको डिप्लोमा गर्नका लागि भारत जानुपर्ने वाध्यता थियो, जुन अव अन्त्य भएको बताउनुभयो ।

कोर्षको पहिलो ब्याजमा ३० जनाको सिट रहेको महासंघले जनाएको छ । महासंघले यस अघि पनि काठमाडौं विश्वविद्यालयसँग मिलेर कोर्ष डिजाइन र गरिबी निवारणमा सहकारीको योगदान सम्बन्धी अध्ययन अनुसन्धानको काम गरेको थियो ।