काठमाडौं । नेपालमा सहकारी स्थापनाको आज ६६औं बर्ष भएको छ । वि. सं. २०१३ चैत २० गते चितवनको बखानपुर ऋण सहकारी संस्थाको स्थापना भइ सहकारी आन्दोलनको सुरुवात भएको दिनलाई स्मरण गर्दै हरेक वर्ष चैत २० गते राष्ट्रिय सहकारी दिवस मनाउने गरिएको हो । आज ६६ औं राष्ट्रिय सहकारी दिवस मुलुकभर विभिन्न कार्यक्रम गरी मनाइदैछ । सहकारी अभियानको सम्भवतः सबैभन्दा ठूलो पर्वका अवसरमा देशभर नै प्रारम्भिकदेखि केन्द्रीय स्तरका संघ संस्थाहरुले र्याली, रक्तदान कार्यक्रम, सरसफाई, गोष्ठी लगायत विभिन्न कार्यक्रम आयोजना गरी दिवस मनाएका छन् । राष्ट्रिय सहकारी महासंघको आव्हानमा काठमाडौं, ललितपुर र भक्तपुरले सयुक्त रुपमा र्यालीको आयोजना गरी माइतीघर मण्डलामा सहकारी दिवस मनाएका छन् । उपत्यका भित्रका तीन जिल्लाले विहान ७ बजे विभिन्न ठाउँबाट शान्तिपूर्ण सहकारी र्याली निकालेर माइतीघर मण्डमा कोषसभा सहित दिवसको भव्य कार्यक्रम मनाएका हुन् । 

६६औं राष्ट्रिय सहकारी दिवसको संयोजक रहेकी महासंघकी बरिष्ठ उपाध्यक्ष ओमदेवी मल्ल र महासंघका अध्यक्ष मिनराज कडेलले माइतीघर मण्डलामा आयोजित कोणसभाको सम्बोधन गर्नुभएको थियो । महासंघले उपत्यकाका सहकारीकर्मीलाई आफ्नो रुट अनुसार झाँकी, ब्यानर र प्लेकार्ड सहित प्रभातफेरी गर्दै माइतीघरमा भेला हुन आव्हान गरेको थियो । सोही अनुरुप नेफस्कून, राष्ट्रिय सहकारी बैंक र जिल्ला संघहरुले पनि सहकारी दिवसलाई सफल बनाउन सक्रिय रुपमा सहभागी हुन सदस्यहरुलाई आव्हान गरेका थिए । 

महासंघले हरेक वर्ष चैत्र २० गते सहकारी दिवसका अवसरमा वर्षभरीका लागि नारा तय गर्ने गरेको छ । यो वर्षका लागि ‘सहकारीको दीगोपनः स्वनियम र सुशासन’ भन्ने थिम तय गरिएको थियो । उक्त आदर्श बाक्य ‘सहकारीको दीगोपनः स्वनियम र सुशासन’ सहितका व्यानर र प्लेकार्ड लिएर सहकारीकर्मीहरुले दिवस मनाएका छन् । 

आज भन्दा ६५ वर्ष अघि अर्थात् २०१३ सालमा आजकै दिन चितवनको शारदानगरमा नेपालको पहिलो सहकारीका रुपमा बखान ऋण सहकारी समिति स्थापना भएको दिनको सम्झनामा प्रत्येक वर्ष यही दिन राष्ट्रिय सहकारी दिवस मनाउने प्रचलन छ । विकासप्रेमी अगुवा स्वर्गीय बखानसिंह गुरुङको संरक्षकत्वमा बखान ऋण सहकारी समिति गठन भएको थियो । सोही कारण गुरुङलाई नेपालको सहकारी अभियानको जन्मदाता, अगुवा, संस्थापक जस्ता उपमाहरुद्वारा सम्मानभाव प्रकट गरिन्छ ।