काठमाडौं । नेपाल बचत तथा ऋण केन्द्रीय सहकारी संघ लि.(नेफ्स्कून) ले भूमि व्यवस्था, सहकारी तथा गरिबी निवारण मन्त्रालयका नवनियुक्त सचिव गोकर्णमणि दुवाडीलाई बधाई तथा शुभकामना ज्ञापन गरेको छ । आज मन्त्रालयमा आयोजित एक संक्षिप्त भेटघाटका क्रममा नेफ्स्कूनका कार्यवाहक अध्यक्ष चन्द्रप्रसाद ढकाल, कोषाध्यक्ष दिपक पनेरु र प्रमुख व्यवस्थापक सञ्जयराज तिमिल्सीनाले सचिव दुवाडीलाई बचत तथा ऋण सहकारी अभियानको तर्फबाट हार्दिक बधाई एवं सफल कार्यकालको शुभकामना प्रदान गर्नुभएको हो । 

सो अवसरमा संक्षिप्त कुराकानी गर्दै सचिव दुवाडीले सहकारीले आफ्ना मुल्य, सिद्धान्त र सहकारी ऐन कानुनको पालनामा विशेष जोड दिनुपर्ने बताउनुभयो । एका दुई सहकारीमा देखिएको समस्याका कारण आम सदस्यहरुको विश्वासमा संकट देखिएको हुँदा सहकारीका विद्यमान समस्या निर्मुल पार्नेगरि आमसदस्यको विश्वास आर्जन गर्ने वातावरण निर्माण गर्न अभियान, सरकार र सम्पूर्ण सरोकारवाला पक्ष एक भएर अगाडि बढ्नुपर्ने आवश्यकता रहेको औल्याउनुभयो । 

भेटका क्रममा नेफ्स्कूनका कार्यवाहक अध्यक्ष ढकालले बचत तथा ऋण सहकारी अभियान र नेफ्स्कूनको गतिविधिबारे संक्षिप्त जानकारी गराउनुभएको थियो ।