काठमाडौं । नेफ्स्कूनका पूर्व सञ्चालक, अग्रज सहकारी अभियन्ता एवम् सामाजिक व्यक्तित्व गोकुलध्वज कार्कीको ७१ वर्षको उमेरमा हिजो साँझ निधन भएको छ । रामेछाप बेताली स्थायी घर भएका उहाँ काठमाडौंको भक्तपुरस्थित नरेफाँटमा बसोबास गर्दै आउनुभएको थियो । शरिरमा असहजतापछि हिजो साँझ करिब साढे सात बजेतिर अस्पताल पुर्याइएका उहाँको त्यही निधन भएको निकटस्थ स्रोतबाट जानकारी प्राप्त भएको छ । आजै पशुपति आर्यघाटमा उहाँको अन्तिम संस्कार गरिएको छ । 

यसैबीच, नेफ्स्कूनका अध्यक्ष चन्द्रप्रसाद ढकाल, कोषाध्यक्ष दिपक थापा, लेखा सुपरिवेक्षण समिति संयोजक इन्द्रराज ज्योति पौडेल लगायत आज आर्यघाट पुगी अन्तिम संस्कारमा सहभागी भई स्वर्गीय कार्कीप्रति हार्दिक श्रद्धाञ्जली व्यक्त गर्नुभएको छ । साथै उहाँहरुले स्वर्गीय कार्कीका परिवारजनका सदस्यहरुलाई भेटी समवेदनासहित सान्त्वना प्रदान गर्नुभएको थियो ।

कर्मथलो दोलखा बनाउनुभएका कार्कीले दोलखाली सहकारीको आधारशिला निर्माण, विकास र प्रवर्धनमा महत्वपूर्ण भूमिका निर्वाह गर्नुभएको थियो । जिरीस्थित तत्कालीन प्रेन्डशीप बचत तथा ऋण सहकारी संस्था लि. (हाल एकीकृत फ्रेण्डशीप साकोस) का संस्थापक अध्यक्ष रहनुभएका कार्कीले त्यहाँ २० वर्ष नेतृत्वदायी भूमिका निर्वाह गर्नुभएको थियो । यसैगरी, उहाँ जिल्ला सहकारी संघ लि. दोलखाका पनि पूर्व अध्यक्ष हुनुहुन्थ्यो भने जिल्ला बचत संघको संस्थापक महासचिव हुँदै पछि सल्लाहकार रहनुभएको थियो ।

तत्कालीन फ्रेण्डशीप साकोसको प्रतिनिधित्व गर्दै उहाँ नेफ्स्कूनको २०५० साल फागुन ३ गते सम्पन्न साधारण सभाबाट लेखा सुपरिवेक्षण समिति सदस्य निर्वाचित हुनुभएको थियो । त्यसपछि, २०५३ सल फागुन ११ गते सम्पन्न साधारण सभाबाट उहाँ सञ्चालक सदस्य निर्वाचित हुनुभएको थियो । त्यसैगरी, २०५७ साल माघ १८ गते सम्पन्न साधारण सभाबाट उहाँ सञ्चालक सदस्य निर्वाचित हुनुभएको थियो । यस्तै, २०६४ साल मंसिर १५ गते बाँकेको नेपालगंजमा भएको साधारण सभाबाट पनि उहाँ पुनः सञ्चालक निर्वाचित हुनुभएको थियो । नेफ्स्कूनमा उहाँको त्यो अन्तिम कार्यकाल थियो । शिक्षण पेशामा आवद्ध कार्की ढुङ्गेश्वरी निमावि (हाल मावि) को प्रधानाध्यापकबाट सेवा निवृत्त हुनुभएको थियो ।

नेफ्स्कूनले कार्कीको असामयिक एवम् अकल्पनीय निधनप्रति गहिरो दुःख व्यक्त गर्दै संघको प्रारम्भिक अवस्थामा लेखा सुपरिवेक्षण समिति तथा सञ्चालक समितिमा बसेर उहाँले मुलुकको सहकारी अभियानमा पुर्याउनुभएको योगदान अविस्मरणीय रहने जनाएको छ । कार्कीको निधनले नेपालको सहकारी अभियानमा अपुरणीय क्षति भएको नेफ्स्कूनले जनाएको छ । साथै संघले शोकको यस घडीमा शोक सन्तप्त परिवारप्रति धैर्यधारण गर्ने शक्ति प्राप्त होस् भनि संघले कामना गरेको छ । विगत लामो समय अमेरिकामा बसोबास गर्नुभएका उहाँ केही महिनाअघि मात्र नेपाल फर्कनुभएको थियो । वि.स २००९ साल पुस २७ गते जन्मनुभएका कार्कीका पत्नी ३ छोरा र १ छोरी छन् ।