बाँके । नेपाल बचत तथा ऋण केन्द्रीय सहकारी संघ लि.(नेफ्स्कून) नेपालगञ्ज सदस्य सेवा कार्यालयको आयोजनामा आज चैत्र ५ गते व्यवसाय प्रवर्धनका लागि साकोसका अध्यक्ष र व्यवस्थापकहरुसँग अन्तरक्रिया कार्यक्रम सम्पन्न भएको छ । 

नेफ्स्कूनका बरिष्ठ उपाध्यक्ष दामोदर अधिकारीको अध्यक्षतामा आयोजित कार्यक्रममा नेफ्स्कून नेपालगञ्ज सदस्य सेवा कार्यालय व्यवस्थापन उप समिति सदस्य कृष्णा पाठकले स्वागत मन्तव्य व्यक्त गर्नुभएको थियो । कार्यक्रममा बाँके जिल्ला बचत संघका अध्यक्ष विष्णु खनालको पनि उपस्थिति रहेको थियो  । कार्यक्रममा जिल्लाका विभिन्न साकोसहरुबाट ३२ जनाको सहभागिता थियो ।

कार्यक्रममा संघका बरिष्ठ उपाध्यक्ष अधिकारीले साकोसले आफ्ना वित्तीय गतिविधिहरुमा उच्च पारदर्शिता कायम गर्नुपर्ने विषय अवगत गराउनुभयो । उहाँले नेफ्स्कूनद्वारा सञ्चालित स्तरीकरण र स्थिरीकरण कोषमा सहभागी भएर साकोसको दिगो र प्रभावकारी सञ्चालनमा लाग्न साकोसका प्रतिनिधिहरुलाई अनुरोध गर्नुभएको थियो । नेफ्स्कून सदैव सदस्यहरुको संघ हो, प्रत्येक सदस्य संघका उत्पादन तथा सेवाहरुमा जोडिन र जोखिमको मापन गरेर अगाडि बढ्न उहाँले सुझाव प्रदान गर्नुभएको थियो । संघले आफू स्वयं स्वनियमनमा रहन एक्सेस कार्यक्रमको आवद्धतालाई अगाडि बढाएको जानकारी गराउनुभएको थियो । 

कार्यक्रमको विषयवस्तुमाथि प्रस्तुतीकरण संघको नेपालगञ्ज सदस्य सेवा कार्यालय प्रमुख छत्र प्रसाद धमालाले गर्नुभएको थियो । कार्यक्रममा सहभागीहरुको जिज्ञासाको सम्बोधन बरिष्ठ उपाध्यक्ष अधिकारीले गर्नुभएको थियो ।