काठमाडौं । नेपाल बचत तथा ऋण केन्द्रीय सहकारी संघ लि.(नेफ्स्कून) को आयोजनामा आज, चैत्र ५ गते सहकारीमा सम्पत्ति शुद्धीकरण निवारण सम्बन्धी एक दिवसीय तालिम सम्पन्न भएको  छ । सम्पत्ति शुद्धीकरण निवारणको विषयमा सहकारी संस्थाको भूमिका, सम्पत्ति शुद्धीकरण निवारण नियमावली, २०७३ मा भएका प्रावधानहरू, विद्यमान ऐन तथा कानुनी संरचना तथा शंकास्पद/सीमा कारोबारका विषयमा जानकारी दिने उद्देश्यले तालिम सञ्चालन गरेको नेफ्स्कूनले जनाएको छ । 

तालिममा काठमाडौं, ललितपुर, भक्तपुर र काभ्रे अन्तर्गतका विभिन्न ३८ सहकारी संस्थाबाट ४५ जनाको सहभागिता रहेको थियो । तालिमको सहजीकरण सि ए राजकुमार फुँयाल र सहकारी विभागका शाखा अधिकृत तिलक राम पोखरेलले गर्नु भएको थियो । 

तालिम समापनका अवसरमा नेफ्स्कूनका सञ्चालक खेमराज सुवेदीले तालिमका सहभागीहरुलाई धन्यवाद दिँदै संघद्वारा सञ्चालित बहुउपयोगि तालिमबाट प्राप्त ज्ञानलाई व्यवहारमा लागु गरेर सुशासित र सुरक्षित संस्था सञ्चालनमा जोड दिन आग्रह गर्नुभयो । विभागको निर्देशनलाई अक्षरशः पालना गर्दै सबै सहकारी संघ संस्थाहरुले नियामक निकायमा उपलब्ध गराउनु पर्ने प्रतिवेनदहरु समयमा बुझाउन पनि अनुरोध गर्नुभयो । संघले आफ्ना सदस्य संघ संस्थाहरुलाई सबलीकरण गर्न समय सापेक्षा तालिम आयोजना गर्ने गरेको छ, त्यसमा सहभागी भएर संस्थागत सम्पूर्ण गतिविधिहरुलाई प्रभावकारी ढंगले सञ्चालन गर्न सुझाउनुभयो । 

तालिम समय सापेक्षा रहेको र तालिमले नयाँ कुराको सिकाई भएको भन्दै सहभागी प्रतिनिधिहरुले तालिम सहजिकरण विधि प्रभावकारी रहेको बताउनुभएको थियो । तालिम प्रवचन, केस स्टडी, प्रयोगात्मक प्रश्नोतरको माध्यममार्फत सञ्चालन गरिएको थियो । 

नेफ्स्कूनका प्राचार्य बल्लभ तिमल्सिनाले तालिमको औचित्य र उद्देश्यमाथि सहभागिहरुलाई जानकारी गराउनु भएको थियो । 

कार्यक्रम सञ्चालन नेफ्स्कूनका तालिम अधिकृत रविन्द्र श्रेष्ठले गर्नु भएको थियो भयो समग्र व्यवस्थापन तालिम सहायक जया घिमिरे गर्नुभएको थियो ।