झापा । झापा जिल्ला बचत तथा ऋण सहकारी संघ लि.को आयोजनामा आज झापामा एक दिवसीय सामाजिक सुरक्षा कोषको कानुनी प्रावधान तथा प्रचलित कर राजश्व सम्बन्धी कार्यक्रम सञ्चालन भएको छ । झापा जिल्ला बचत संघका अध्यक्ष तुलाराम न्यौपानेको अध्यक्षतामा आयोजित कार्यक्रममा नेपाल बचत तथा ऋण केन्द्रीय सहकारी संघ लि.(नेफ्स्कून) का महासचिव घनश्याम अधिकारी प्रमुख व्यक्तिको रुपमा रहनुभएको थियो । कार्यक्रममा झापा जिल्लाका १५ वटै स्थानीय निकाय अन्तर्गत सञ्चालित विभिन्न ५९ बचत तथा ऋण सहकारी संघ संस्थाका अध्यक्ष र व्यवस्थापकहरु गरि १०१ जनाको सहभागिता रहेको थियो । 

कार्यक्रमका प्रमुख अतिथि नेफ्स्कूनका महासचिव घनश्याम अधिकारीले सहकारीका समसामयिक वस्तुस्थितिबारे जानकारी गराउँदै सहकारी प्रतिस्थापन विधेयक मार्फत  साँघुरो घेरामा राखिएका विषयहरु संशोधन भएको जानकारी गराउनुभयो । सहकारी नियमन प्राधिकरण गठनको व्यवस्थादेखि कर्जा सूचना केन्द्र, बचत तथा कर्जा सुरक्षण कोषजस्ता राम्रा विषय अध्यादेशमा समावेश भएकोप्रति सकारात्मक धारणा प्रस्तुत गर्नुभएको थियो । 

त्यसैगरि महासचिव अधिकारीले सम्पूर्ण साकोसहरु सामाजिक सुरक्षा कोषमा आबद्ध रहि कार्यरत कर्मचारीहरुलाई योगदानमा आधारित सामाजिक सुरक्षा कोषमा सहभागी गराउन अनुरोध गर्नुभएको थियो ।   

 
कार्यक्रममा योगदानमा आधारित सामाजिक सुरक्षा कोष, २०७४ र सामाजिक सुरक्षा नियमावली २०७६ मा भएको व्यवस्था र यसको आवश्यकता सम्बन्धमा सामाजिक सुरक्षा कोषका अधिकृत दिपक राज भट्टले सहजीकरण गर्नुभएको थियो । त्यसैगरि प्रचलित कर राजश्व सम्बन्धी सहजीकरण ट्याक्स अफिसका अधिकृत ज्ञानेन्द्र बहादुर राईले गर्नुभएको थियो ।  

कार्यक्रम सञ्चालन संघका सचिव याम कुमार चुडालले गर्नुभएको थियो भने व्यवस्थापन सहजीकरण संघकी व्यवस्थापक कोपिला बजगाईंले गर्नुभएको थियो ।