सुनसरी । नेपाल बचत तथा ऋण केन्द्रीय सहकारी संघ लिमिटेड नेफ्स्कून द्वारा नमुना बचत तथा ऋण सहकारी संस्था लिमिटेड, मोरगंको स्थलगत सुपरिवेक्षण मंशिर ९ गते सम्पन्न भएको छ ।

नेफ्स्कूनले सहकारी संस्थाहरूमा पारदर्शिता, उत्तरदायित्व, सदस्य हितको सुनिश्चितता, जोखिम न्यूनीकरण, सुशासन र दिगोपनाको प्रवद्र्धन गर्ने उद्देश्यले देशभरका सहकारीहरूको स्थलगत सुपरिवेक्षण कार्यलाई निरन्तररूपमा अघि बढाइरहेको छ । अनुगमनका क्रममा संस्थाको स्तरीकरणका लागि आवश्यक विभिन्न सूचकहरू — ऋण वर्गिकरण, कर्जा, बचत, ब्याजदर, वार्षिक योजना, सम्पत्ति शुद्धिकरण निवारण नीति, नियामक निकायका निर्देशनहरूको पालना, भाखा नाघेका ऋणको असुली, पूँजी प्रयाप्तता अनुपात लगायतका विषयमा विस्तृत मूल्याङ्कन गरेको थियो । कर्वस कार्यक्रममा आबद्ध रहेको नमुना साकोसको कानुनी जोखिम, वित्तीय जोखिम, ऋण जोखिम, तरलता जोखिम, संचालन तथा सुशासन सम्बन्धी जोखिमहरूमा केन्द्रित रही संस्थाको समग्र जोखिम न्यूनीकरणका लागि व्यावहारिक सुधारात्मक सुझावहरू प्रदान गरिएको थियो ।

सुपरिवेक्षणमा नेफ्स्कूनका तर्फबाट अधिकृत मुकेश दाहाल र सदस्य सेवा सहायक डिल्लि राम तिम्सिना सहभागी रहनु भएको थियो । संस्थाको तर्फबाट कर्वस कार्यदल संयोजक कुबेर प्रसाद पौडेल, सदस्य सदानन्द निरौला,भिमा देबी रिजाल व्यवस्थापक निपेश पौडेल साथै अन्य प्रतिनिधिहरुको उपस्थितिमा छलफल सम्पन्न भएको थियो । संस्थाले स्थलगत अनुगमन पश्चात, सहकारी संस्थाको सुधार गर्नुपर्ने पक्षहरूमा सुझाव प्रदान गर्दै उक्त सुझावहरुलाई कार्यान्वयन गर्ने सहमति सहित निर्णय गरिएको छ ।