दोलखा । जनसचेतन बचत तथा ऋण सहकारी संस्था लि. दोलखा र बचत तथा ऋण केन्द्रीय सहकारी संघ लिमिटेड (नेफ्स्कून) विच व्यवसाय विकास सेवा कार्यक्रम कार्यान्वयनका लागि माघ ६ गते संघको केन्द्रीय कार्यालयमा दुबै पक्ष विच सम्झौता भएको छ । 

जनसचेतन बचत तथा ऋण सहकारी संस्था लि. को वितीय र संस्थागत क्षमता अभिवृद्धि गरी सहकारीले आफ्ना सदस्यहरुमा लगानी गर्ने ऋणहरुलाई उत्पादनसँग जोड्दै तिनै सदस्यहरुले उत्पादन गरेका बस्तुहरुलाई सहज रुपमा राष्ट्रिय तथा अन्तर्राष्ट्रिय वजारका ग्राहकहरुसँग सिधा सम्पर्क गराई सहकारी उद्यमीहरुलाई उद्योगी बनाउनका लागि यो कार्यक्रमको सुरुवात गरिएको संस्थाका अध्यक्ष गोपालध्वज श्रेष्ठले बताउनु भयो ।  

वित्तीय सहकारी संस्थाले आफ्ना सदस्यहरुलाई पाँचवर्ष भित्रमा उद्यमी देखी उद्योगीसम्मको रुपान्तरणीय अभ्यास मार्फत सफल उद्यमी निर्माण गर्दै सहकारी भित्रै दिगो र संस्थागत व्यवसाय विकास कार्यक्रम विडीएस  (बीडीएस) डेक्स प्रणाली स्थापना गरी सम्भाव्य उद्यमीहरुको सीप, सोच, श्रम, पूँजि वजार व्यवस्थापन र उत्पादन सेवा, सञ्जाल विस्तार, प्रबिधि र प्राबिधिक सहजीकरण गर्ने उद्धेश्य रहेको यो कार्यक्रमको सम्झौतामा नेफ्स्कूनको तर्फबाट बरिष्ठ अधिकृत नबिन राज दाहाल र साकोसका प्रमुख कार्यकारी अधिकृत नवराज दाहालको हस्ताक्षर तथा संघका नि. कार्यकारी अधिकृत गणेश प्रसाद तिमल्सिना, साकोसका अध्यक्ष गोपालध्वज श्रेष्ठको रोहबरमा सम्झौता सम्पन्न भएको थियो ।