सर्लाही । सर्लाही जिल्ला बचत संघद्वारा सहकारी दर्ता तथा इजाजतपत्र प्रक्रियालाई थप प्रभावकारी र विधि–सम्मत बनाउन लक्षित एकदिने प्रशिक्षण फागुन १ गते सम्पन्न भएको छ । 

जिल्ला बचत संघका अध्यक्ष मन्दिरा आचार्यको सभाध्यक्षता  भएको कार्यक्रममा प्रमुख अतिथि नेफ्स्कूनका अध्यक्ष चन्द्रप्रसाद ढकालले सहकारी क्षेत्रका दिगोपन र पारदर्शिता माथि केंद्रित महत्वपूर्ण विचारहरू प्रस्तुत गर्नुभएको थियो ।

हाल संघले सहकारीहरूलाई सुशासन, पारदर्शिता र वित्तीय अनुशासनमा उन्मुख बनाउने उद्देश्यले प्रवद्र्धन गरिरहेको कार्यप्रति जोड दिँदै, राष्ट्रिय सहकारी नियमन प्राधिकरणमा सहकारी दर्ता अब अनिवार्य र समयबद्ध प्रक्रिया बनेको स्मरण गराउनुभयो । विशेषगरी बचत तथा ऋण कारोबार भएका सहकारी संस्थाहरूले तोकिएको अवधीभित्र दर्ता प्रक्रिया पूरा गरी इजाजतपत्र प्राप्त गर्नु अपरिहार्य भएको उहाँको भनाइ थियो ।

अध्यक्ष ढकालले ‘मिरा’ सफ्टवेयर मार्फत सहकारीको लेखा–प्रणाली, सदस्य सेवा र वित्तीय कारोबार अब आधुनिक, पारदर्शी र व्यवस्थित बनाउने अभियानलाई पनि संस्थाहरूले प्राथमिकताका साथ अंगीकार गर्न आग्रह गर्नुभयो ।

कार्यक्रममा सहकारी दर्ता तथा नियमनसम्बन्धी मुख्य प्राविधिक प्रस्तुति स्वस्तिक साकोसका व्यवस्थापक बिनोद थापाले दिनुभएको थियो । प्रशिक्षणमा जिल्लाका २६ वटा सहकारी संस्थाको सहभागिता रहेको आयोजकले बताउनु भयो । कार्यक्रम सञ्चालन जिल्ला बचत संघका सचिव केशव प्रसाद ढकालले गर्नुभएको थियो ।