काठमाडौँ । नेपाल बचत तथा ऋण केन्द्रीय सहकारी संघ लि.(नेफ्स्कून) को आयोजना र DSIK जर्मनीको प्राविधिक सहयोगमा नेफ्स्कूनका अधिकृत तहका कर्मचारीहरुका लागि कृषक व्यवसाय खेल (Farmers Business Game-FBG) प्रशिक्षक प्रशिक्षण तालिम चैत्र १७ गते (आज) बाट भक्तपुरमा शुरु भएको छ । 

तालिमको उद्घाटन नेफ्स्कूनका अध्यक्ष चन्द्र प्रसाद ढकालले गर्नुभएको छ । सात दिन सम्म सञ्चालन हुने आवाशीय तालिम डीएस्आईके जर्मनीबाट प्रमुख प्रशिक्षक डा.कार्ला, अल्बर्ट, र लाउराले सहजीकरण गर्नुहुनेछ । 

तालिममा संघका अध्यक्ष चन्द्र प्रसाद ढकालले साकोसका कृषि पेशामा आवद्ध सदस्य किसानहरुलाई निर्वाहमुखी कृषि पेशाबाट व्यवसायिक कृषिमा रुपान्तरणका लागि अन्तरनिहित महशुस गराउने एक औजारको रुपमा यस तालिमले सहयोग पुर्र्याउने विश्वास व्यक्त गर्नुभयो ।

संघका प्रमुख कार्यकारी अधिकृत डा. शिवजी सापकोटाले डीएस्आईकेको समन्वयमा उच्च स्तरको तालिम तथा कार्यक्रमहरु नेफ्स्कून मार्फत तीब्र रुपमा अगाडि बढिरहेको र यसको प्रभावकारिता अत्यन्त महत्वपूर्ण रहेको बताउनुभयो । यस तालिम लिएका कर्मचारीहरुले स्थलगत रुपमा सहजीकरण मार्फत दक्ष प्रशिक्षकको रुपमा नेफ्स्कूनका अधिकृत स्तरका कर्मचारीहरु सीपयुक्त कर्मचारी स्रोतको रुपमा विकास हुने विचार व्यक्त गर्नुभयो । यसले संघका आन्तरिक व्यवसायहरुमा सहयोग पुग्ने पनि विश्वास लिएको बताउनुभयो । 

यस तालिममा संघको कार्यक्रम तथा विकास हेर्ने बरिष्ठ अधिकृत नविन राज दाहाल लगायत संघका अधिकृत स्तरका १९ जना कर्मचारीहरुको सहभागिता रहेको छ । तालिम सञ्चालन संघका कार्यक्रम अधिकृत रिता सुवेदीले गर्नुभएको छ तालिम चैत्र २३ गते समापन हुनेछ ।