रूपन्देही । एसियाली ऋण महासंघका प्रमुख प्राविधिक अधिकृत रञ्जिथ हेटियाराच्चीले रूपन्देहीको कोटिहवास्थित जनउत्थान बचत तथा ऋण सहकारी संस्थाको स्थलगत अवलोकन भ्रमण गर्नुभएको छ ।

भ्रमणका क्रममा संस्थाका सहायक व्यवस्थापक सुरज जैसीले संस्थाको समग्र वित्तीय अवस्था, सामाजिक प्रभाव तथा आगामी योजनाबारे विस्तृत प्रस्तुतीकरण दिनुभएको थियो । उहाँले संस्थाको सदस्य संरचना, ऋण उपयोगको अवस्था तथा सामाजिक उत्तरदायित्व अन्तर्गत सञ्चालन भइरहेका कार्यक्रमहरूबारे जानकारी गराउनुभयो ।

जैसीका अनुसार संस्थामा हाल ४२ हजार ९ सय १९ सदस्य रहेका छन्, जसमा करिब ६० प्रतिशत महिला सदस्य छन् । त्यस्तै, कुल ऋणीमध्ये ७९ प्रतिशतले लघु कर्जा उपयोग गरिरहेको तथा संस्थाले जेष्ठ नागरिक स्याहार केन्द्रजस्ता कल्याणकारी कार्यक्रम सञ्चालन गर्दै आएको जानकारी दिनुभएको थियो ।

संस्थाले अपनाएको सेवामुखी कार्यशैली, सदस्यकेन्द्रित व्यवस्थापन तथा समुदायको जीवनस्तर सुधारमा देखाएको प्रभावबाट प्रमुख प्राविधिक अधिकृत हेटियाराच्ची प्रभावित हुनुभएको थियो । 

सो अवसरमा बोल्दै हेटियाराच्चीले जनउत्थान साकोसको कार्यशैलीलाई “उच्च मार्ग नेतृत्व” को संज्ञा दिनुभयो । नाफाभन्दा माथि उठेर सदस्यको हित, नैतिक मूल्य र सामाजिक उत्तरदायित्वलाई प्राथमिकतामा राख्ने नेतृत्व नै दीगो र सफल हुने उहाँको भनाइ थियो ।

उहाँले संस्थाको नेतृत्वलाई यहि मार्गमा निरन्तर अघि बढ्न सुझाव दिँदै प्रविधि र मानवीय सेवाको संयोजन मार्फत हासिल गरिएको ९८.८ प्रतिशत सदस्य सन्तुष्टि विश्व सहकारी अभियानका लागि अनुकरणीय उदाहरण भएको उल्लेख गर्नुभयो ।