लमजुङ । लमजुङ जिल्लाको बेसीशहर नगरपालिकामा सहकारी क्षेत्रको दिगो विकास तथा आधुनिकीकरणलाई लक्ष्य गर्दै डिजिटल रूपान्तरण सम्बन्धी एक दिवसीय अभिमुखीकरण कार्यक्रम जेठ २७ गते सम्पन्न भएको छ । 

बेसीशहर नगरपालिकाको समन्वय, नेफ्स्कून लमजुङ सदस्य सेवा कार्यालय र नियोसिस टेक्नोलोजीको संयुक्त आयोजनामा कार्यक्रम नगरपालिकाको सभाहलमा सम्पन्न भएको हो । 

कार्यक्रममा लमजुङ जिल्लाभरिका ४० वटा सहकारी संस्थाबाट ५५ जना प्रतिनिधिहरूको सहभागिता रहेको थियो । सहभागीहरूले सहकारी संस्थामा डिजिटल प्रणालीको प्रयोग, सेवा प्रवाहमा सुधार तथा वित्तीय व्यवस्थापनलाई प्रविधिमैत्री बनाउने विषयमा विस्तृत छलफल गरेका थिए । 

कार्यक्रमको सञ्चालन नेफ्स्कून लमजुङ सदस्य सेवा कार्यालय प्रमुख सन्देश घिमिरेले गर्नुभएको थियो । उहाँले सहकारी क्षेत्रलाई समयसापेक्ष डिजिटल प्रविधिसँग जोडेर अझ पारदर्शी, सुरक्षित, दिगो र प्रभावकारी बनाउनु आजको मुख्य आवश्यकता रहेको औंल्याउनुभयो । 

त्यस्तै, बेसीशहर नगरपालिका सहकारी शाखा प्रमुख रेशम घिमिरेले कार्यक्रममा आफ्नो मन्तव्य राख्दै सहकारी संस्थाहरूलाई आधुनिक प्रविधिसँग जोड्दा सेवा प्रवाहमा गुणात्मक सुधार आउने र पछिल्लो समय बजारमा देखिएको चुनौतीका बीच सदस्यहरूको विश्वास अझ मजबुत हुने धारणा व्यक्त गर्नुभयो । साथै आजको अवस्थामा पारदर्शिता एवं नियामक निकायसंगको रिपोर्टिंगका निम्ति प्रविधि आधारभुत आवश्यकता रहेको जानकारी गराउनु भयो । कार्यक्रमको सहजीकरण नियोसिस टेक्नोलोजीका प्रमुख कार्यकारी अधिकृत (CEO) मनोज तिवारीले गर्नुभएको थियो । सहकारी क्षेत्रका लागि विशेष रूपमा डिजाइन गरिएको Software as Service (SaaS)  क्लाउड–आधारित “मिरा इआरपी” (Myra ERP) सफ्टवेयरको प्राविधिक क्षमता र यसका बहुआयामिक विशेषताहरूबारे विस्तृत प्रस्तुतीकरण दिनुभएको थियो। यस प्रणालीले सहकारीहरूलाई पूर्ण रूपमा कागजविहीन र आधुनिक बनाउने जानकारी दिँदै उहाँले यसमा एकीकृत कोर बैंकिङ, Loan Process & Document Management System,  रियल–टाइम  ABBS  कारोबार र Reporting  , स्वचालित लाभांश बाँडफाँड, र ‘मिरा एप’ मार्फत डिजिटल सुविधाहरू रहेको बताउनुभयो ।

अन्तर्राष्ट्रिय ISO 27001:2022 प्रमाणित थ्री–लेयर सुरक्षा, स्वचालित Backup & Replication र नियामक मापदण्डका प्रतिवेदनहरू एकै क्लिकमा निकाल्न सकिने यस प्रणालीमा बस्तु तथा सेवाको कारोबार गर्ने सहकारीका निम्ति  Inventory Management System, दैनिक कलेक्सनका निम्ति MR Collector App  र बिदाको दिनमा समेत  Cooperative Care Center मार्फत प्राविधिक सहयोग उपलब्ध हुनेछ। प्रणालीको जोखिम न्यूनीकरण गर्न अनिवार्य दुई प्रयोगकर्ता  (User) रहने गरी ’पे एज यु ग्रो’ (Pay As You Grow ) मोडल अन्तर्गत प्रति प्रयोगकर्ता जम्मा ८ हजार रुपैयाँमा उपलब्ध हुने भएकाले यो सबै साना–ठूला सहकारीका लागि निकै किफायती रहेको र महिला सहकारीहरूका लागि थप ३५ प्रतिशत छुटको आकर्षक व्यवस्था समेत गरिएको सीईओ तिवारीले जानकारी गराउनुभयो । 

डिजिटल रूपान्तरण मार्फत लमजुङको सहकारी क्षेत्रलाई अझ सक्षम, उत्तरदायी र प्रतिस्पर्धी बनाउने प्रतिबद्धताका साथ कार्यक्रम समापन भएको थियो।