सिन्धुली । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) जनकपुर सदस्य सेवा कार्यालयको आयोजनामा सिन्धुलीमा सञ्चालित तीनदिने ‘म्यानेजर्स बुटक्याम्प’ जेठ २८ गते सम्पन्न भएको छ ।

जेठ २६ गतेदेखि सञ्चालन भएको बुटक्याम्प सहकारी संस्थामा कार्यरत व्यवस्थापकहरूको क्षमता अभिवृद्धि, नेतृत्व विकास तथा व्यावसायिक दक्षता सुदृढ गर्ने उद्देश्यले आयोजना गरिएको थियो । 

कार्यक्रममा सहकारी व्यवस्थापनमा देखिएका समसामयिक चुनौती तथा तिनका समाधानका उपायबारे गहन छलफल गरिएको थियो । 

तालिममा सिन्धुली तथा आसपासका २३ वटा बचत तथा ऋण सहकारी संस्थाका २७ जना व्यवस्थापकहरूको सहभागिता रहेको थियो । बुटक्याम्प मार्फत सहभागीहरूलाई रणनीतिक योजना निर्माण, जोखिम व्यवस्थापन तथा सदस्य सेवालाई थप गुणस्तरीय बनाउने विषयमा आवश्यक ज्ञान र सीप प्रदान गरिएको आयोजकले जनाएको छ ।

तालिमको सहजीकरण नेफ्स्कूनका सहायक प्रमुख कार्यकारी अधिकृत गणेश प्रसाद तिमल्सिना र अधिकृत रविन्द्र श्रेष्ठले गर्नुभएको थियो । उहाँहरूले सहकारी ऐन, नियमावली तथा नेफ्स्कूनका मापदण्डअनुसार संस्था सञ्चालन गर्ने विधि र प्रविधिबारे विस्तृत प्रस्तुतीकरण गर्नुभएको थियो ।

समापन कार्यक्रममा बोल्दै तालिम व्यवस्थापक तथा नेफ्स्कून जनकपुर सदस्य सेवा कार्यालयका प्रमुख राजेन्द्र ढकालले सहकारी संस्थाको दिगोपन र संस्थागत सुदृढीकरणमा व्यवस्थापकहरूको भूमिका महत्वपूर्ण रहने बताउनुभयो । उहाँले सहकारी संस्थालाई प्रविधिमैत्री र व्यावसायिक बनाउन तालिमबाट प्राप्त ज्ञान तथा सीपलाई व्यवहारमा लागू गर्नुपर्नेमा जोड दिनुभयो ।

यस बुटक्याम्पले सहभागी व्यवस्थापकहरूमा नयाँ ऊर्जा, आत्मविश्वास र व्यावसायिक दृष्टिकोण विकास गरेको छ भन्ने विश्वास लिएको बताउनुभयो । 

सहभागीहरूले तालिमले दैनिक कार्यसम्पादनका क्रममा सामना गर्नुपर्ने जटिलताहरू समाधान गर्न तथा संस्थागत नेतृत्व क्षमता अभिवृद्धि गर्न सहयोग पुगेको प्रतिक्रिया दिएका छन् । तालिम अवधिभर समूहगत कार्य, केस स्टडी तथा प्रयोगात्मक अभ्यास मार्फत सिकाइलाई प्रभावकारी बनाइएको थियो ।

नेफ्स्कूनले आफ्ना सदस्य संस्थाहरूलाई सक्षम, प्रतिस्पर्धी र व्यावसायिक बनाउने उद्देश्यका साथ यस्ता तालिम तथा कार्यशाला नियमित रूपमा सञ्चालन गर्दै आएको जनाएको छ । सिन्धुलीमा सम्पन्न बुटक्याम्पले सहभागी संस्थाहरूको सेवा प्रवाह तथा संस्थागत व्यवस्थापनमा सकारात्मक सुधार ल्याउने अपेक्षा गरिएको छ ।