सुनसरी । नेपाल बचत तथा ऋण केन्द्रीय सहकारी संघ लि. (नेफ्स्कून) सुनसरी सदस्य सेवा कार्यालयको आयोजनामा इटहरीमा ‘साकोस जोखिम व्यवस्थापन ३६०’ कार्यशाला जेठ २८ गते सम्पन्न भएको छ ।

संघले कार्यान्वयनमा ल्याएको नियमित निरीक्षण तथा अनुगमन कार्यक्रम स्क्यान अन्तर्गत सुनसरी,मोरङ र उदयपुर जिल्लाका सहकारी संस्थालाई लक्षित गरी कार्यशालाको आयोजना गरिएको हो । कार्यक्रममा सुनसरी,मोरङ र उदयपुरका २९ वटा बचत तथा ऋण सहकारी संस्थाका सञ्चालक तथा कर्मचारीहरू गरी ६० जनाको सहभागिता रहेको थियो ।

नेफ्स्कूनका सञ्चालक सदस्य शालिकराम ढकालको अध्यक्षतामा सम्पन्न कार्यक्रममा नेफ्स्कूनका सुनसरी सदस्य सेवा कार्यालयका व्यवस्थापन उप समिति सदस्य त्रिभुनाथ फुयालले सहभागीहरुलाई स्वागत गर्नुभएको  थियो ।

कार्यक्रमलाई सम्बोधन गर्दै अध्यक्ष तथा नेफ्स्कूनका सञ्चालक सदस्य शालिकराम ढकालले कार्यशाला पूर्ण रूपमा प्राविधिक प्रकृतिको भएकाले सहभागीहरूलाई विषयवस्तुमा केन्द्रित हुन आग्रह गर्नुभयो । सहकारी क्षेत्र हाल कानुनी तथा नीतिगत परिवर्तनका कारण केही चुनौतीपूर्ण अवस्थामा रहे पनि सहकारी अभियान अझ सुदृढ हुँदै जाने विश्वास व्यक्त गर्नुभयो । 

सुशासनविहीन संस्थाहरू जोखिमतर्फ उन्मुख हुने उल्लेख गर्दै गुणस्तरीय संस्था निर्माणका लागि स्तरीकरण कार्यक्रम र यस्ता क्षमता विकासमूलक गतिविधिहरूलाई निरन्तरता दिनुपर्ने आवश्यकता औंल्याउनुभयो । संस्थागत समस्याहरू स्वाभाविक भए पनि तिनलाई व्यवस्थापन गर्दै अघि बढ्नु नै सफलताको आधार भएको उल्लेख गर्नुभयो । 

नेफ्स्कूनले सदस्य संघ–संस्थाहरूको नियमित निरीक्षण तथा अनुगमन मार्फत जोखिम स्तर निर्धारण, जोखिम व्यवस्थापन तथा गुणस्तर सुनिश्चित गर्ने उद्देश्यले विगतमा सञ्चालन गरिएका एक्सेस, प्रोवेसन र कव्र्स कार्यक्रमका अनुभवलाई समेटेर थप परिमार्जित स्वरूपमा ‘साकोस जोखिम व्यवस्थापन ३६०’ कार्यशाला सञ्चालनमा ल्याएको हो । सदस्यहरूको लागत सहभागितामा सञ्चालन हुने यस कार्यक्रम मार्फत संस्थाहरूलाई आवश्यक ज्ञान, सीप र व्यवहारिक मार्गदर्शन प्रदान गरिने संघले जनाएको छ ।

नेफ्स्कूनका बरिष्ठ अधिकृत भरत प्रसाद न्यौपानेले कार्यशालाको सहजीकरण गर्दै सहकारी संस्थाहरूको कार्यसम्पादनलाई व्यवस्थित, पारदर्शी र कानुनी मापदण्ड अनुकूल बनाउने उद्देश्यसहित विभिन्न विषयमा अभिमुखीकरण प्रदान गर्नुभएकोे थियो । यस क्रममा सूचना प्रबिधि अधिकृत कृपेश लामिछाने र कर्जा असुली न्यायाधिकरणका अधिकृत नबिन मैनालीले साइबर सुरक्षा र कर्जा असुली न्यायाधिकरण र  तथा आगामी आर्थिक वर्षको वार्षिक योजनामा समावेश गर्नुपर्ने महत्वपूर्ण कार्यबारे विस्तृत प्रशिक्षण गर्नुभएको थियो  ।  

कार्यक्रम सञ्चालन नेफ्स्कूनका कार्यक्रम अधिकृत रिसभ राज रेग्मीले गर्नुभएको थियो भने समग्र व्यवस्थापन बिन्दा भट्टराई र डिल्लीराम तिम्सिनाले गर्नुभएको थियो ।