काठमाडौं । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) र समस्याग्रस्त सहकारी व्यवस्थापन समितिका पदाधिकारीहरूबीच नेफ्स्कूनमा आबद्ध रहि समस्याग्रस्त घोषित  बचत तथा ऋण सहकारी संस्थाहरूको दायित्व फरफारक सम्बन्धी विषयमा यहि असार १० गते समितिको कार्यालय, बुद्धनगर काठमाडौंमा छलफल भएको छ ।

छलफलका क्रममा समस्याग्रस्त सहकारीहरूको व्यवस्थापन, दायित्व फरफारक तथा सहकारी क्षेत्रसँग सम्बन्धित सरकारी निकायहरू र संघबीच आगामी दिनमा गरिने सहकार्यका विषयमा समेत विचार–विमर्श गरिएको थियो । साथै, सहकारी क्षेत्रको विकास र व्यवस्थापनका लागि आपसी समन्वय तथा सैद्धान्तिक सहमति कायम गर्दै अगाडि बढ्नुपर्ने विषयमा पनि गहन छलफल भएको थियो ।

उक्त कार्यक्रममा समस्याग्रस्त सहकारी व्यवस्थापन समितिको कार्यालयका अध्यक्ष डिल्लिराज आचार्य, सदस्यहरू छत्रप्रसाद रिमाल र रोशन बहादुर शाक्य, सदस्य–सचिव रविन ढकाल तथा नेफ्स्कूनका अध्यक्ष चन्द्रप्रसाद ढकाल, प्रमुख कार्यकारी अधिकृत डा. शिवजी सापकोटा, सहायक कार्यकारी अधिकृत गणेशप्रसाद तिमल्सिना, वरिष्ठ अधिकृत दिनेश गौतम र  व्यवसाय अधिकृत अस्मिता अधिकारीको उपस्थिति रहेको थियो ।