एजेन्सी । अमेरिकामा प्रत्येक वर्ष आयोजना हुने कृषक सहकारी सम्मेलन यस वर्ष भर्चुअल आयोजना गरिएको छ । कोभिड महामारीका कारण उक्त सम्मेलन यो वर्ष पहिलो पटक अभौतिक आयोजना गरिएको थियो ।अमेरिकाभरका १ सय ७० कृषक सहकारी अभियन्ता तथा कर्मीहरु एवम् त्यस क्षेत्रमा अभिरुचि राख्ने व्यक्तिहरु सहभागी सम्मेलनमा कोभिड १९ ले पारेको प्रभावका बारेमा छलफल भएको थियो । सम्मेलनमा सहभागीहरुले हालसम्मको असर केलाउनुका साथै भावी रणनीतिका बारेमा छलफल गरेका छन् ।

अमेरिकामा हालै सम्पन्न निर्वाचन र त्यसले गरेको नेतृत्व परिवर्तनले कृषि सहकारीका क्षेत्रमा पुर्याउने असरका सम्बन्धमा पनि सहभागीहरु छलफलमा जुटेका हुन् । सम्मेलनमा युवा सहकारीकर्मीहरुले कृषिमार्फत अर्थतन्त्रको विकासमा पुर्याउन सकिने योगदानका साथै यात्रिकीकरण, नवीनतम सोच, सहकारी मैत्री सेवा प्रवाह तथा बजारिकरण आदिका बारेमा चर्चा भएको जनाइएको छ । कार्यक्रममा कृषि सहकारीको सम्भावना र चुनौतीहरुका सम्बन्धमा विभिन्न सोधमुलक कार्यपत्रहरु पनि प्रस्तुत गरिएका थिए । कार्यक्रममा अमेरिकाका ८ विश्व विद्यालयका २६ विद्यार्थीहरुलाई कृषि सहकारीका जल्दाबल्दा विषयमा जानकारी उपलब्ध गराउने उद्देश्यले निःशुल्क सहभागी गराइएको थियो । नोभेम्बर अन्त्यमा आयोजना गरिएको उक्त सम्मेलनका सहभागीहरुले २४ औं कृषक सहकारी सम्मेलन भौतिक रुपमै आयोजना गर्न सकिने अपेक्षा समेत गर्नुभएको थियो ।