काठमाडौं । स्याङ्जाको कालिगण्डकी गाउँपालिकाका सबै प्रकृतिका सहकारीहरुको अवस्था विश्लेषणको काम सम्पन्न भएको छ । नेफ्स्कूनले स्थानीय निकायहरुसँगको समन्वयमा सबै प्रकृतिका सहकारीहरुको अवस्था विश्लेषण, प्रोफाइल तयारी, आवश्यक तालिम, शिक्षाका कार्यक्रमहरुसँगै सक्षमता विकास र उद्यमशिलता प्रवर्धन लगायतका क्षेत्रमा सहयोग गर्ने उद्देश्यसहित लागू गरेको आधारशिला कार्यक्रम अन्तर्गत कालिगण्डकी गाउँपालिकाका सहकारीहरुमा जागरणको प्राथमिक चरणको काम सम्पन्न भएको हो ।

हाल स्याङ्जामा रहनुभएकी स्नेफ्स्कूनकी कार्यक्रम अधिकृत रीता सुवेदीका अनुसार कालिगण्डकी गाउँपालिकाभर कुल १८ वटा सहकारी संस्थाहरु रहेको पाइएको छ । ती संस्थाहरुको अवस्था, सदस्य संख्या, कारोबार, ऋण लगानी, कार्यालय व्यवस्थापन, कर्मचारी, सञ्चालक समिति, साधारण सभा आदि विषयमा सम्पूर्ण जानकारी अद्यावधिक गर्ने काम सम्पन्न भएको छ । विभिन्न सूचकहरुका आधारमा उनीहरुको वस्तुस्थिति अध्ययनको पहिलो चरण सम्पन्न भएको नेफ्स्कूनकी कार्यक्रम अधिकृत सुवेदीले जानकारी गराउनुभयो । कालिगण्डकी गाउँपालिकासँग २०७८ माघ ८ गते आधारशिला कार्यक्रम कार्यान्वयन सम्झौता भएको थियो । तथ्याङ्क र सूचना संकलनको पहिलो चरणको काम सम्पन्न भएसँगै अब चाँडै दोस्रो चरणको काम सुरु हुने सुवेदीले बताउनुभयो । पहिलो चरणको जागरण कार्यक्रमसँगै विकास, प्रवर्धन र सञ्जालीकरण गरी ४ चरणमा आधारशिला कार्यक्रमलाई विभक्त गरिएको छ ।