काठमाडौं । बागमती प्रदेश सहकारी विकास बोर्डको आयोजनामा मकवानपुरको हेटौंडामा सञ्चालित दुई दिवसीय गोष्ठी सहकारी क्षेत्र सुधारको प्रतिबद्धता सहित सातबुँदे घोषणापत्र जारी गर्दे आज सम्पन्न भएको छ । 

सहकारी संघ संस्थाहरुको सहभागितामा ‘सहकारी क्षेत्रमा देखिएका समस्या समाधान र अवसर’ विषयक कार्यशाला गोष्ठीले सहकारी अभियान सुधारका विषयहरुसहितको ७ बुँदे प्रतिवद्धता जाहेर गरेको हो । 

गोष्ठीमा राष्ट्रिय सहकारी महासंघ, प्रदेश सहकारी मन्त्रालय, नेपाल बचत तथा ऋण केन्द्रीय सहकारी संघ लि.(नेफ्स्कून), बागमती प्रदेश संघ र जिल्ला संघ तथा बचत संघका प्रतिनिधिहरुको सहभागिता रहेको थियो । गोष्ठीले बागमती प्रदेशमा सहकारी संस्था गठनको आवश्यकता, पहुँच एवं संस्थाहरुको तथ्यांकको आधारमा न्युनतम मापदण्ड बनाई नयाँ संस्था दर्ताको व्यवस्था गर्ने प्रतिवद्धता जनाएको छ । 

त्यसैगरी सहकारी ऐन र नियमावलीसँग बाझिएका ऐन कानुन संशोधन गरी अभियानसँगको सहकार्यमा छुट्टै वित्तीय सहकारी ऐन जारी गर्ने, बागमतीमा रहेका सहकारी संस्थाहरुमा सुशासन कायम गर्न, मन्त्रालय र संघहरुको सहभागितमा प्रदेश र जिल्ला स्तरमा अनुगमन संयन्त्र बनाउने, अनुगमनको सूचकहरु तयार गर्ने र जनशक्तिको क्षमता अभिवृद्धि गरी संस्थाहरुको अनुगमन, स्तरीकरण र स्थिरीकरणका कार्यक्रमहरु सञ्चालन गर्ने लगायतका विषयहरु प्रतिवद्धतामा उल्लेख छन् । 

प्रदेश भित्रका सहकारीको नियमनमा कानुनी र नीतिगत एकरुपता कायम गर्नका लागि स्थानीय तहहरुसँग समन्वय र सहजीकरण गर्ने र समस्यामा परेका संघसंस्थाहरुको अध्ययन गरी पुनः सञ्चालनमा ल्याउन सहयोग पुर्याउने उल्लेख छ । 

मन्त्रालय र अभियानबीचको सहकार्यमार्फत गरिबी निवारण, उत्पादन, प्रशोधन र बजारीकरणका कार्यक्रमहरु लक्षित समुदायसम्म पुर्याउन आगामी बजेटमा समावेश गरी कार्यान्वयनको पहल गर्ने, उत्पादनमूलक सहकारी संस्थाहरुको पूर्वाधार विकास र सदस्यलाई उत्पादनमा लगाउन पर्याप्त बजेट विनियोजन गर्ने विषयहरु घोषणापत्रमा उल्लेख छन् ।