काठमाडौं । बंगलादेश बचत तथा ऋण केन्द्रीय सहकारी संघ (सिसियुएलबी) को विशेष निमन्त्रणामा बंगलादेश एक्सोपर भिजिट २०२२ सहभागिताका लागि नेफ्स्कून, सहकारी मन्त्रालय र विभागको प्रतिनिधि सम्मिलित टोलि आज बंगलादेश प्रस्थान गरेको छ ।

भ्रमण टोलिमा नेपाल बचत तथा ऋण केन्द्रीय सहकारी संघ लि. (नेफ्स्कून) का महासचिव दामोदर अधिकारी, सहकारी विभागका उपरजिष्ट्रार टोलराज उपाध्याय विभागका शाखा अधिकृत द्वय इश्वर प्रसाद आचार्य र शोभा घिमिरे, सहकारी मन्त्रालयका शाखा अधिकृत गोपी निरौला, सञ्चार संयोजक तुलसी माया सापकोटा र नेफ्स्कूनका बरिष्ठ तालिम अधिकृत नविनराज दाहाल रहनुभएको छ । 

भ्रमण टोलिलाई नेफ्स्कूनका अध्यक्ष परितोष पौड्याल, बरिष्ठ उपाध्यक्ष चन्द्रप्रसाद ढकाल र प्रमुख कार्यकारी अधिकृत प्रकाश प्रसाद पोखरेलले दुइदेश बीचको सद्भावपूर्ण अवलोकन भ्रमणका लागि विदाई तथा शुभकामना प्रदान गर्नुभएको थियो । 

नेपाल बचत तथा ऋण केन्द्रीय सहकारी संघ लि.(नेफ्स्कून) र बंगलादेश बचत तथा ऋण केन्द्रीय सहकारी संघ बीच सद्भाव भ्रमणहरु विगतदेखि हुँदै आएका छन् । बचत तथा ऋण सहकारी अभियानबीचका अन्तर्राष्ट्रिय अनुभव आदानप्रदानले सहकारी प्रवर्धनमा थप टेवा पुग्ने र सिकाई अनुभवलाई दुई देशबीच आदान प्रदान गर्ने अवसर प्राप्त हुँदै आएको छ । 

बंगलादेश बचत तथा ऋण केन्द्रीय सहकारी संघ र नेफ्स्कूनबीच १७ बर्षदेखि सद्भावपूर्ण अवलोकन भ्रमण कार्यक्रमले निरन्तरता पाउँदै आएको छ ।