सर्लाही । मधेश प्रदेशका बचत तथा ऋण सहकारी संस्थाको नेतृत्व तहमा रहेकाहरुलाई नविनतम नेतृत्व विकास तालिम प्रदान गरिएको छ । नेफ्स्कून फिल्ड कार्यालय सर्लाहीको आयोजनामा सञ्चालित दुई दिवसीय तालिममा सर्लाही, महोत्तरी र रौतहटका बचत तथा ऋण सहकारी संस्थाका ३३ जना सञ्चालकहरुको सहभागिता रहेको थियो ।

श्रावण १५ र १६ गते सगुन साकोस सर्लाहीको सभाहलमा आयोजित तालिमको अध्यक्षता नेफ्स्कून सर्लाही फिल्ड कार्यालय व्यवस्थापन उपसमिति सदस्य विभु कुमार पोखरेल र प्रमुख आतिथ्यता सर्लाही जिल्ला बचत संघका अध्यक्ष बाबुराम घिमिरेले गर्नुभएको थियो । कार्यक्रममा जिल्ला बचत संघका कोषाध्यक्ष मन्दिरा आचार्य र सगुन साकोसका अध्यक्ष केशव ढकालको आतिथ्यता रहेको थियो । 

जिल्ला बचत संघका अध्यक्ष बाबुराम घिमिरेले हिजोको कुरा आज पुरानो हुने भएकोले सहकारीकर्मीले सँधै नयाँ कुरा सिक्ने कौतुहलता राख्नुपर्ने बताउनुभयो । उहाँले सहकारीमा मात्र नभइ सिङ्गो समाजमा सहकारीकर्मीले नेतृत्वदाई भुमिका खेल्नुपर्ने वताउनु भयो । 

सगुन साकोसका अध्यक्ष केशव ढकालले नेफ्स्कूनद्वारा सञ्चालित तालिम गुणस्तरीय हुने विश्वास व्यक्त गर्दै नेफ्स्कूनले बचत तथा ऋण सहकारी अभियानलाई गुणात्मकता प्रदान गर्न महत्वपूर्ण भूमिका खेलेको बताउनुभयो ।  

सभाध्यक्ष विभु कुमार पोखरेलले तालिमवाट सिकेका कुराहरुलाइ अधिकतम संस्थामा कार्यन्वयन गर्न अनुरोध गर्दै तालिमले साकोसको गुणस्तरीय विकासमा योगदान गर्ने विश्वास व्यक्त गर्नुभयो ।

 तालिममा सहभागी सहकारीकर्मी डाकुरनाथ खतिवडाले तालिमबाट प्राप्त सिकाइ कार्यान्वयन गर्न सके नेतृत्वकलामा नयाँ आयाम विकास गर्न र साकोस सञ्चालनमा गुणस्तर कायम गर्न सघाउ पुग्ने विश्वास  व्यक्त गर्नुभयो ।

तालिमको सहजिकरण नेफ्स्कूनका कार्यक्रम अधिकृत विदुर खड्काले गर्नु भएको थियो भने कार्यक्रम सञ्चालन फिल्ड कार्यलय सर्लाहीका इन्चार्ज महेश वरालले गर्नु भएको थियो ।