सुर्खेत । वीरेन्द्रनगर नगरपालिका–४ भैरवस्थानमा मुख्य कार्यालय रहेको पिपलबोट बचत तथा ऋण सहकारी संस्था लि.ले महिला परिचालन उपसमितिको आयोजनामा हरितालिका तिज बिशेष कार्यक्रम तथा महिला लक्षित बचत योजना शुभारम्भ कार्यक्रम सञ्चालन गरेको छ । 

हरितालिका तीज २०७९ को पूर्वसन्ध्यामा साकोसले “नारी बचत नारी गर्व ढुक्क सँग मनाऊँ पर्व” मुल नारा राखी पिपलबोट नारी पर्व बचत योजना शुभारम्भ गरेको हो । नारी पर्व वचत योजनाको शुभारम्भ वीरेन्द्रनगर नगरकार्यपालिकाकी सदस्य टिका कुमारी घले, साकोसका अध्यक्ष बल बहादुर सार्की र कोषाध्यक्ष खेमराज रावतले संयुक्त रुपमा गर्नुभएको थियो । 

नारी पर्व बचत योजनामा साकोसका ३९० जना भन्दा बढि सेयर सदस्यहरुको सहभागिता रहेको छ । महिला सदस्यहरुलाई बचत बृद्धि अभियानमा जोड्न पर्व बचत महत्वपूर्ण अवसरको रुपमा रहेको र आगामी दिनमा युवा तथा जेष्ठ नागरिक लक्षित बचत योजना सुरुवात गर्ने योजना समेत रहेको साकोसका अध्यक्ष बल बहादुर सार्कीले बताउनु भयो ।

साकोसमा हाल २ हजार ५ सय ९२ सेयर सदस्य रहेका छन । कुल सदस्य संख्याको महिला शेयर सदस्य ५६ प्रतिशत अर्थात १४ सय ५७ जना छन् । कुल बचतमा महिला सदस्यको मात्रै ६१ प्रतिशत बचत निक्षेप रहेको र पिपलबोट नारी पर्व बचत योजना शुभारम्भकै दिनमा ३१ जना महिला शेयर सदस्यहरुबाट रु.६० हजार बचत संकलन भएको प्रबन्धक रमेश खनालले जानकारी गराउनुभयो । 

चाडपर्व मनाउन गरिने खर्चमा मितव्ययी भएर सहकारीका सदस्यहरुलाई बचत गर्न प्रोत्साहन गर्ने कार्यक्रमको उद्देश्य रहेको प्रवन्धक खनालले बताउनुभयो ।