कैलाली । कोअपरेटिभ म्यानेजर्स क्लब (सिएमसी) कैलालीको आयोजना र नेपाल बचत तथा ऋण केन्द्रीय सहकारी संघ लिमिटेड (नेफ्स्कून) को प्राविधिक सहयोगमा सञ्चालित कर्मचारीको क्षमता विकास तालिम आइतबार सम्पन्न भएको छ ।

सिएमसी कैलालीका अध्यक्ष छबिलाल जैशीको सभापत्विमा भएको तालिमको उद्घाटन सत्रमा टीकापुर नगरपालिकाका नगर प्रमुख रामलाल डगौरा प्रमुख अतिथि रहनुभएको थियो भने नेफ्स्कूनका सञ्चालक तथा कञ्चनपुर फिल्ड व्यवस्थापन उपसमिति संयोजक माधव प्रसाद जोशी, विशिष्ट अतिथि रहनुभएको थियो । कार्यक्रममा सम्बोधन गर्दै प्रमुख अतिथि डगौराले सहकारी संस्थाहरुले सानो सानो पूँजी संकलन गरेर समाजलाई विकासको गतिमा अगाडि बढाउन भूमिका खेल्नुपर्ने बताउनुभयो । त्यसैगरी विशिष्ट अतिथि जोशीले सहकारी क्षेत्रलाई स्थानीय सरकारहरुले आवश्यक सहयोग तथा नियमनमा विशेष भूमिका खेल्नुपर्नेमा जोड दिनुभयो । कार्यक्रममा टीकापुर नगर सहकारी सञ्जालका अध्यक्ष बद्रि प्रसाद भट्टराई, नेफ्स्कून धनगढी सेवा केन्द्र प्रमुख योगेश बोहोरा लगायतको उपस्थिति रहेको थियो ।

सिएमसी कैलालीका सचिव नरेन्द्र टमट्टाले सञ्चालन गर्नुभएको कार्यक्रममा स्वागत मन्तव्य उपाध्यक्ष लालबहादुर भण्डारीले गर्नुभएको थियो । तालिम सहजीकरण नेफ्स्कूनका तालिम अधिकृत रविन्द्र श्रेष्ठले गर्नुभएको थियो । भाद्र १८ र १९ गते सञ्चालित तालिममा कैलाली जिल्लाभरबाट विभिन्न सहकारीका ३० जना व्यवस्थापक तथा सहायक स्तरका कर्मचारीहरुको सहभागिता रहेको थियो ।