बुटवल । प्रदेश बचत तथा ऋण सहकारी संघ लि. (प्रोस्कून) लुम्बिनी को आयोजनामा 'सहकारीमा महिला नेतृत्व विकास' सम्बन्धी एक दिवसीय तालिम सञ्चालन गरिएको छ । माघ २१ गते बुटवलमा सम्पन्न तालिममा विभिन्न २७ बचत तथा ऋण सहकारी संस्थाका महिला अध्यक्ष तथा सञ्चालक गरी ४७ जनाको सहभागिता थियो । प्रोस्कून लुम्बिनी महिला परिचालन उपसमितिको आयोजनामा सञ्चालित तालिमको सहजीकरण नेफ्स्कून सञ्चालक सदस्य ज्ञानु पौड्यालले गर्नुभएको थियो ।

तालिममा सहकारी विकास र सुशासनका लागि समान प्रतिनिधित्व र नेतृत्व, संस्थागत उद्देश्य र लक्ष्य प्राप्तिका लागि विना भेदभाव, स्वच्छ प्रतिष्पर्धाको वातावरणमा महिलाहरुले प्रतिनिधित्व गर्न पाउने समान अवसरको सृजना आदि विषयमा अन्तरक्रियात्मक प्रशिक्षण भएको थियो । सहकारी संस्थामा महिला सक्रियता, सहभागिता एवं आर्थिक तथा सामाजिक अवस्था सुधार गर्न सहकारी सस्ंथाहरुको आर्थिक सामाजिक कार्यक्रम तथा व्यवसाय विकासमा टेवा दिन विभिन्न कार्यक्रमको आयोजना गर्नु पर्ने सहभागीहरुको धारणा थियो । 

प्रोस्कून लुम्बिनीका अध्यक्ष कृष्णप्रसाद नेपालको अध्यक्षतामा सञ्चालित उद्घाटन सत्रको सञ्चालन  संघका सञ्चालक सदस्य तथा महिला परिचालन उपसमिति संयोजक निर्मला अधिकारीले गर्नु भएको थियो । सहभागी सहकारीकर्मीहरुलाई प्रोस्कून लुम्बिनीका कोषाध्यक्ष प्रेम गुरुङले धन्यवाद ज्ञापन गर्नु भएको थियो ।