काठमाडौं । शिक्षक कल्याण साकोस चरिकोट दोलखाको आयोजना तथा नेफ्स्कूनको प्राविधिक सहजीकरणमा साकोस सञ्चालकहरुको क्षमता अभिवृद्धि तालिम (CUDCC) भक्तपुरको नगरकोटमा सम्पन्न भएको छ । असार १३ गतेदेखि १६ गतेसम्म सञ्चालित तालिममा साकोसको सञ्चालक समिति, लेखा सुपरिवेक्षण समिति, उपसमिति तथा उच्च व्यवस्थापनको सहभागिता थियो । 

तालिम समापनमा सहभागी हुनुभएका नेफ्स्कूनका अध्यक्ष चन्द्रप्रसाद ढकालले तालिमको सिकाइ संस्थाको व्यवहारमा झल्कनुपर्नेमा जोड दिनुभयो । सहकारी क्षेत्रका समसामयिक विषयवस्तु र नेफ्स्कूनको बहसपैरवीबारे पनि उहाँले सहभागीहरुलाई जानकारी गराउनुभएको थियो ।

सहकारी क्षेत्रले राज्यलाई तिरेको करको बारेमा अर्थमन्त्रालयसँग जानकारी माग गरिएको भन्दै अध्यक्ष ढकालले सहकारी क्षेत्रले राज्यलाई तिरेको करको आधारमा यस क्षेत्रको विकास र प्रवर्धनका लागि भएका प्रयासहरुको अब वस्तुगत मूल्याङकन तथा विश्लेषण गर्ने बेला आएको बताउनुभयो ।

यसैगरी, उहाँले कर्जा असुली न्यायाधिकरण, बचत तथा कर्जा सुरक्षण कोष लगायत सहकारी ऐनका प्रावधानहरु छिट्टै कार्यान्वयन हुने जानकारी गराउनुभयो । उक्त तालिम सहजीकरण नेफ्स्कूनका अधिकृतहरु कोमलराज अधिकारी तथा श्यामराजा तिमल्सिनाले गर्नुभएको थियो । तालिम उपलब्धिमूलक भएको प्रतिक्रिया सहभागीहरुको थियो ।