काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) र कास्की  बचत तथा ऋण सहकारी संघबीच सञ्जाल साझेदारी सम्झौता सम्पन्न भएको छ । आज २०८१ कार्तिक १ गते नेफ्स्कून पोखरा सदस्य सेवा कार्यालयमा द्धिपक्षीय सम्झौता सम्पन्न भएको हो । नेफ्स्कून सञ्चालक सदस्य एवम् पोखरा सदस्य सेवा कार्यालय व्यवस्थापन उपसमिति संयोजक कमलादेवी गिरी र कास्की बचत संघका सचिव मिनराज तिमिल्सिनाले सम्झौता आदानप्रदान गर्नुभएको हो ।

कार्यक्रममा बचत संघकी सञ्चालक सदस्य मेनका पौडल सहित नेफ्स्कून सदस्य सेवा कार्यालयक प्रमुख दिप्ती आचार्य लगायतको उपस्थिति थियो । 

यसैबीच, सञ्जाल साझेदारी सम्झौताले साकोस अभियानको सबलीकरण, सुदृढीकरण तथा गुणस्तरीयता विकासमा महत्वपूर्ण टेवा पुर्याउने विश्वास नेफ्स्कून र कास्की बचत संघले लिएका छन् । 

सञ्जाल साझेदारीमा बिस्तारै सबै संघहरु जोडिदैं जाँदा साकोस अभियान एकीकृत एवम् बलियो हुने भन्दै यसले सकारात्मक सन्देश प्रवाह गर्ने दुबै संघले जनाएका छन् । सञ्जाल साझेदारीमार्फत समन्वय र सहकार्य गरेर अघि बढ्दा सहकारी संस्थाहरुलाई थप टेवा पुग्ने धारणा संघहरुको रहेको छ । सञ्जाल साझेदारीले केन्द्रीय संघ र जिल्ला संघ दुबैको भूमिकलाई प्रभावकारी बनाउने विश्वास लिइएको छ । 

पछिल्लोपटक २०८१ असोज २३ गते नेफ्स्कून र जिल्ला बचत संघ मकवानपुरबीच सञ्जाल साझेदारी सम्झौता सम्पन्न भएको थियो भने २०८१ असोज ८ गते मंगलबार नेफ्स्कून केन्द्रीय कार्यालयमै बागमती प्रदेश अन्तर्गतका ६ जिल्ला संघहरुसँग पनि सञ्जाल साझेदारी सम्झौता सम्पन्न भएको थियो । 

नेफ्स्कूनले सञ्जाल व्यवस्थापनलाई छैठौं रणनीतिक मार्गचित्रको प्राथमिकतामा राखेको छ ।