काठमाडौं । प्रोवेसन बागमती प्रदेश समूह (क्लष्टर) को दोस्रो कार्यकुशलता तथा सिकाइ व्यवस्थापन (पाम) कार्यशाला चैत्र ११ गते चितवनको भरतपुरमा सम्पन्न भएको छ । अन्तरक्रियात्मक मोडलमा सञ्चालित ‘पाम’ कार्यशालामा २५ बचत तथा ऋण  सहकारी संस्थाबाट अध्यक्ष, पदाधिकारी, कार्यदलका संयोजक र व्यवस्थापक गरि ४८ जनाको सहभागिता थियो ।

कार्यक्रमको अध्यक्षता नेपाल बचत तथा ऋण केन्द्रीय सहकरी संघ लि.(नेफ्स्कून) की उपाध्यक्ष शान्ति अधिकारीले गर्नुभएको थियो । कार्यक्रममा संघका सञ्चालक गोपाल प्रसाद गौतम, प्रमुख कार्यकारी अधिकृत डा. शिवजी सापकोटा, बरिष्ठ कार्यक्रम अधिकृत भरत न्यौपाने लगायत संघका कर्मचारीहरुको उपस्थिति थियो । 

कार्यक्रम उद्घाटन सत्रलाई सम्बोधन गर्दै संघका उपाध्यक्ष शान्ति अधिकारीले दिगो वित्तीय सेवा र संस्थागत सुशासन कायम गर्न नेफ्स्कूनद्वारा प्रवर्द्धित प्रोबेशन कार्यक्रम बहुउपयोगी रहेको बताउनुभयो । उहाँले बचत तथा ऋण सहकारी अभियानमा कहि कतैबाट प्रश्न चिन्ह खडा नहुने गरि काम गर्न अनुरोध गर्दै साकोस र साकोसबिच तथा साकोस र नेफ्स्कूनबिचको सामुहिक ऐक्यबद्धता कायम गरेर अगाडि बड्न सहभागीहरुलाई अनुरोध गर्नुभयो । सहकारी क्षेत्रमा अहिलेको समय  भनेको संस्था सुरक्षित राख्ने र दिगो संस्था निर्माण गर्ने समय हो, हामीले सदस्य जागरणका कार्यक्रमहरु, वित्तीय साक्षरता कक्षाहरु सञ्चालन गर्ने र सदस्य क्रियाशिलतामा निरन्तरता ल्याउने खालका कामहरु गर्नुपर्छ, उहाँले भन्नुभयो । 

नेफ्स्कूनका सञ्चालक गोपाल प्रसाद गौतमले कार्यक्रमका सहभागीहरुलाई स्वागत गर्दै प्रोवेसन कार्यक्रमले संस्थालाई दिगो र संस्थागत सुशासन कायम गर्न सहयोग पुर्याएको जानकारी गराउँदै कार्यशालमा तोकिएका जिम्मेवारीहरु पूर्ण रुपमा कार्यान्वयन गरेर अगाडि बड्न सहभागी साकोसकर्मीहरुलाई अनुरोध गर्नुभयो । 

संघका प्रमुख कार्यकारी अधिकृत डा.शिबजी सापकोटाले ‘पाम’ कार्यशालाको उद्देश्य र मोडालिटीमा गरिएको परिवर्तनबारे जानकारी गराउँदै दिगो साकोस सञ्चालनको मार्गचित्र सम्बन्धमा सहजीकरण गर्नुभएको थियो । संघका बरिष्ठ अधिकृत भरत प्रसाद न्यौपानेले पर्ल्सका मुख्य बिषयहरुमा छलफल सहित समसामयिक बिषयहरुको प्रस्तुतीकरण गर्नुभएको थियो भने कार्यक्रम अधिकृत बिनोद ढकालले पर्ल्सका सूचकहरु सम्बन्धी प्रस्तुतीकरण गर्नुभएको थियो । कार्यक्रमका सहभागीहरुले ‘पाम’ कार्यशालाले जिम्मेवारी कार्यान्वयनमा थप उर्जा सञ्चार गरेको प्रतिक्रिया व्यक्त गर्नुभएको थियो । 

यस कार्यक्रममा संघको चितवन सदस्य सेवा  व्यवस्थापन उपसमितिका सदस्यहरु, २५ वटा साकोसवाट ४८ जना र संघको कर्मचारी सहित ५५ जनाको सहभागीता रहेको छ । 

कार्यक्रमको सञ्चालन संघका कार्यक्रम अधिकृत बिनोद ढकालले गर्नुभएको थियो । कार्यक्रममा नेफ्स्कूनक चितवन सदस्य सेवा कार्यालयका ईन्चार्ज यमकला सुबेदी, बरिष्ठ व्यवसाय सहायक गणेश ढकाल पनि सहभागी हुनुहुन्थ्यो ।