भरतपुर । नेपाल बचत तथा ऋण केन्द्रीय सहकारी संघ लि.(नेफ्स्कून) ले सोमबार चितवनको भरतपुरमा सहकारीका समसामयिक विषयकेन्द्रित अन्तरक्रिया गरेको छ । अन्तरक्रिया कार्यक्रममा चितवन र नवलपरासी जिल्लाका विभिन्न बचत तथा ऋण सहकारी संस्थाबाट ४७ जना व्यवस्थापन प्रमुखहरुको सहभागिता रहेको थियो । 

कार्यक्रममा संघका अध्यक्ष चन्द्र प्रसाद ढकाल, सञ्चालक गोपाल प्रसाद गौतम, प्रमुख कार्यकारी अधिकृत डा. शिवजी सापकोटा सहित कर्मचारीहरुको उपस्थिति रहेको थियो । 

नेफ्स्कूनका अध्यक्ष ढकालले सहकारीका समसामयिक पछिल्ला घटनाक्रम, सहकारी विधेयक, राष्ट्र बैंकद्वारा जारी नयाँ निर्देशनले समेटेका विषयवस्तु र बचत तथा ऋणको कारोबार गर्ने सहकारी संघ संस्थाहरुका लागि सहकारी नियमन प्राधिकरण गठनका सन्दर्भमा अभियानको सुझाव संकलन गर्ने उद्देश्यसहित छोटो बसाई आयोजना गरिएको बताउनुभयो । सहकारी सञ्चालनमा देखिएका चुनौति तथा असहजताहरुलाई सहज बनाउन, बचत तथा ऋण सहकारी संघ संस्थाहरुको सुरक्षण र व्यवस्थापनका लागि सरकारले राष्ट्रिय सहकारी नियमन प्राधिकरण गठन गरेको विषय प्रष्ट पार्दै प्राधिकरणको भूमिकालाई प्रभावकारी बनाउन अभियानको राय सुझाव पनि उत्तिकै जरुरी हुने उहाँले बताउनुभयो । दिगो र सुरक्षित साकोस अभियान निर्माणका लागि नीतिगत सबलता आवश्यक पर्ने हुँदा नेफ्स्कूनले निरन्तर सरोकारवालाहरुसँग वहश पैरवी गरिरहेको र सदस्य साकोसहरुको अनुगमन सुपरिवेक्षणको कामलाई पनि तीब्र रुपले अगाडि बढाइरहेको उहाँको भनाई थियो । 

नेफ्स्कूनका सञ्चालक गोपाल प्रसाद गौतमले सहकारी संस्था सञ्चालनमा सुशासन सबैभन्दा महत्वपूर्ण पक्ष रहेको बताउनुभयो । उहाँले सदस्यकेन्द्रित सेवा प्रवाह र वित्तीय सुशासन सहकारी संस्थाको गहन पाटो भएको विचार व्यक्त गर्नुभयो ।  

संघका सिइओ सापकोटाले सहकारी क्षेत्रभित्रका वर्तमान चुनौती, अवसर, नीति र सुधारको विषयमा आफ्ना विचार राख्दै संघले समस्याको समाधानका उपायहरु खोजी गरिरहेको, निरन्तर सरोकारवालाहरुसँग वहश तथा पैरवी गरिरहेको जानकारी गराउनुभयो । सहकारी ऐन संशोधनमा नेफ्स्कूनले निरन्तर पैरवी गर्दै सहकारीमैत्री ऐन निर्माणमा महत्वपूर्ण भूमिका खेलेको बताउनुभयो । कोभिड शुरु भएदेखिनै विश्व आर्थिक मन्दीको प्रभावले नेपालको अर्थतन्त्र समस्यामा पार्यो, त्यसको प्रत्यक्ष असर सहकारीमा पनि पर्यो । अहिले सहकारीले सामना गरिरहेको कानुनी, प्राविधिक र वित्तीय व्यवस्थापनको पाटोमा नेफ्स्कूनले निरन्तर अनुगमन तथा सुपरिवेक्षको कामलाई अगाडि बढाएको छ, सहकारीको दिगो विकासका लागि पारदर्शिता र सुशासन कायम गर्न कार्यक्रम मार्फत अर्थात एमआईएस सिस्टम मार्फत नियमित मोनिटरिङ गरिरहेको उहाँले बताउनुभयो । अन्तरक्रियामा सहभागी सहकारीकर्मीहरुले विद्यमान कानुनी असहजता, राष्ट्र बैंकद्वारा जारी नयाँ निर्देशन तथा मापदण्ड, तरलता गणनाको विषय, सहकारी नियमन प्राधिकरणको भूमिका, नेफ्स्कूनको आगामी रणनीतिहरुका सम्बन्धमा जिज्ञासा राख्नुभएको थियो । सहभागीहरुबाट प्राप्त जिज्ञासाहरुको सम्बोधन संघका सिईओ सापकोटाले गर्नुभएको थियो ।