सुनसरी। नेपाल बचत तथा ऋण केन्द्रीय सहकारी संघ लिमिटेड (नेफ्स्कून) सदस्य सेवा कार्यालय सुनसरीको आयोजनामा व्यवसाय प्रवर्द्धन बैठक तथा अन्तरक्रिया कार्यक्रम कार्तिक १७ गते सुनसरी, ईटहरीस्थित पाथीभरा होटेलको सभाहलमा सम्पन्न भएको छ ।

कार्यक्रमको अध्यक्षता नेफ्स्कूनका अध्यक्ष चन्द्र प्रसाद ढकालले गर्नुभएको थियो भने स्वागत मन्तव्य संघका सञ्चालक शालिकराम ढकालले राख्नुभएको थियो। कार्यक्रमको उद्देश्यबारे नेफ्स्कूनका सञ्चालक लक्ष्मी सापकोटाले प्रकाश पार्नुभएको थियो ।

सहभागीहरूको जिज्ञासामा अध्यक्ष ढकालले तरलता व्यवस्थापन, स्क्यान कार्यक्रमको महत्व, दोहोरो सदस्यता, सहकारीका नीतिगत सवालहरु, सहकारी क्षेत्रमा प्राधिकरणको भूमिका, र नेफ्स्कूनको धारणा सम्बन्धी जानकारी दिनुभएको थियो। कार्यक्रममा संघका सञ्चालक शालिकराम ढकालको पनि उपस्थिति रहेको थियो।

साकोस नेतृत्वबाट ३० भन्दा बढीको सहभागितामा सम्पन्न कार्यक्रमको सञ्चालन तथा सहजीकरण सुनसरी सदस्य सेवा कार्यालय प्रमुख रिसभ राज रेग्मीले गर्नुभएको थियो भने व्यवस्थापन निस्चल खतिवडाले गर्नुभएको थियो।