रामेछाप । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले सहकारी संस्थाहरूको जोखिम न्यूनीकरण, सुशासन तथा दिगोपनामा अभिवृद्धिका लागि अघि बढाएको स्क्यान कार्यक्रम अन्तर्गत समृद्धि बचत तथा ऋण सहकारी संस्था लिमिटेडको स्थलगत सुपरिवेक्षण मंसिर ९ र १० गते सम्पन्न भएको छ ।

सुपरिवेक्षणको उद्देश्यः स्क्यान कार्यक्रममा आवद्ध रहेको यस संस्थाको स्तरीकरणका लागि नेफ्स्कूनद्वारा स्थलगत सुपरिवेक्षण गरिएको हो । सुपरिवेक्षणले संस्थाको समग्र आर्थिक अवस्था र उपलब्ध सेवा सुविधाको जाँच गर्नुका साथै निम्न मुख्य विषयहरूमा केन्द्रित रहेर कार्य गरेको थियो 

•   सम्पत्ति र दायित्व व्यवस्थापन
•  कार्यालय व्यवस्थापन 
•   नियामकिय व्यवस्था परिपालना 

संस्थाको वर्तमान स्थितिः रामेछाप जिल्लाको उमाकुण्ड गाउँपालिका २, रन्नज्योतीबजार, बाम्तिभण्डार रामेछापमा अवस्थित समृद्धि साकोसमा हाल   २७७९ जना शेयर सदस्यहरू छन्, जसमध्ये पुरुष शेयर सदस्यको संख्या महिला शेयर सदस्यको भन्दा केही बढी छ। कुल सदस्यमध्ये ५८७ जना (करिब २१ प्रतिशत) सदस्यले ऋण लिएका छन् । संस्थाको कुल सम्पत्ति रु.२२ करोडभन्दा बढी रहेको छ, र ऋण लगानी (रु. १९ करोडभन्दा बढी) संस्थाको कुल बचत संकलन  (रु. १८ करोडभन्दा बढी) भन्दा केही बढी देखिन्छ ।

सुधार योजना र कार्यान्वयन प्रतिबद्धताः स्थलगत सुपरिवेक्षण सम्पन्न भएपश्चात् नेफ्स्कूनका कार्यक्रम अधिकृत सुमनराज घिमिरेले संस्थाको सञ्चालक समिति र व्यवस्थापन समक्ष सहजीकरण गरी छलफल गर्नुभएको थियो । सोही छलफलबाट संस्थाको सुधार योजना तयार गरी कार्यान्वयन गर्ने प्रतिबद्धता संस्था पक्षबाट व्यक्त भएको छ ।