धादिङ । संगम आयआर्जन बचत तथा ऋण सहकारी संस्था लिमिटेड, धादिङले आफ्ना सदस्यहरूको क्षमता अभिवृद्धि तथा सहकारी नेतृत्वप्रति आवश्यक ज्ञान अभिमुखीकरण गर्ने उद्देश्यसहित एकदिने पूर्व नेतृत्व अभिमुखिकरण कार्यक्रम सम्पन्न गरेको छ। नेपाल बचत तथा ऋण केन्द्रीय सहकारी संघ लिमिटेड (नेफ्स्कून) को प्राविधिक सहयोगमा आयोजित कार्यक्रम मंसिर १० गते सम्पन्न भएको हो।

कार्यक्रममा ४५ जना सदस्यहरूको सक्रिय सहभागिता रहेको थियो। सहभागीहरूले सहकारीको सुशासन, सदस्यको दायित्व र भूमिका, नेतृत्व विकास, सहकारी क्षेत्रमा अपनाउनु पर्ने पारदर्शिता एवं उत्तरदायित्वका विषयमा विस्तृत जानकारी प्राप्त गरेका थिए। अभिमुखिकरणले सहकारी व्यवस्थापनमा सदस्य–नेतृत्वको सहभागिता कस्तो रूपमा प्रभावकारी बन्न सक्छ भन्नेबारे समेत व्यावहारिक दृष्टिकोण प्रदान गरेको संस्थाले जनाएको छ।

कार्यक्रमको सञ्चालन सहकारीकी सचिव कविता छत्कुलीले गर्नुभएको थियो। भने नेफ्स्कूनका कार्यक्रम अधिकृत सन्दीप राज ढकालले प्रशिक्षण सामग्री प्रस्तुत गर्दै सहकारी क्षेत्रको वर्तमान चुनौती, अवसर, जोखिम व्यवस्थापन, सदस्य शिक्षाको महत्व तथा सहकारी संचालनमा आवश्यक प्राविधिक पक्षबारे सहजीकरण गर्नुभएको थियो।

संगम आयआर्जन साकोसले यस्ता कार्यक्रमले सहकारी तथा सदस्यहरूको क्षमतामा थप वृद्धि हुने विश्वास व्यक्त गरेको छ। संस्था भविष्यमासमेत सदस्य विकास तथा संस्थागत क्षमता अभिवृद्धि सम्बन्धी कार्यक्रमहरू निरन्तर सञ्चालन गर्ने तयारीमा रहेको बताएको छ।