सर्लाहि । ईश्वरापूर ६ बयलवास सर्लाहि स्थित स्वस्तिक बचत तथा ऋण सहकारी संस्था लि. को आयोजना जर्मन स्पार्कसेन्स्टिफ्टुङ्ग (German Sparkassenstiftung) को सहयोग तथा नेपाल बचत तथा ऋण केन्द्रीय सहकारी संघ लि. (नेफ्स्कून) को प्राविधिक सहजीकरणमा दुई दिवसीय बचत खेल तालिम माघ २० गते सम्पन्न भएको छ । 

कर्मचारी लक्षित बचत खेल तालिम आयोजनाले कर्मचारी र साकोसका सदस्यहरु दुवैमा वित्तीय साक्षरता र सशक्तिकरणप्रति जागरुग बनाउने विश्वास रहेको साकोसले जनाएको छ ।

माघ १९ र २०, दुई दिनसम्म सञ्चालित बचत खेल तालिमले सहभागीहरूबीच बचत व्यवहार, वित्तीय योजना, र समूह गतिशीलतामा व्यावहारिक अन्तर्दृष्टि प्रदान गर्नुको साथै वित्तीय निर्णय लिन सहजता प्रदान गरेको विश्वास सहभागीहरुले व्यक्त गरेका थिए । 

तालिमको मुख्य उद्देश्य कर्मचारीहरुमा वित्तीय साक्षरता अभिवृद्धि गर्नुका साथै उनीहरुलाई व्यवहारिक रूपमा बचत र खर्च व्यवस्थापनका सिप बारे प्रशिक्षण गराई सदस्यहरुलाई सिप हस्तान्तरण गर्न सक्ने बनाउनु हो । 

समापन कार्यक्रमको अध्यक्षता संस्थाका अध्यक्ष विष्णुहरी मैनालीले गर्नुभएको थियो । २६ भन्दा बढीको सहभागीता रहेको तालिमको प्राविधिक सहजीकरण नेफ्स्कूनका कार्यक्रम अधिकृत सुर्य प्रसाद तिमल्सिना र सन्दीपराज ढकालले गर्नुभएको थियो ।