काठमाडौं । लमजुङको सुन्दरबजार स्थित एभरेष्ट बचत तथा ऋण सहकारी संस्था लिमिटेडको आयोजनामा सञ्चालित तीन दिवसीय ‘कृषक व्यवसाय खेल तालिम’ लमजुङमा जेठ १७ गते सम्पन्न भएको छ । 

नेपाल बचत तथा ऋण सहकारी संघ लि. (नेफ्स्कून) को प्राविधिक सहयोग र द जर्मन स्पार्कासेनस्टिफ्टुङ फर इन्टरनेसनल कोअपरेसन (BDS) को सहकार्यमा आयोजना गरिएको तालिममा साकोसका कृषि पेशामा संलग्न सदस्यहरूलाई लक्षित गरी आयोजना गरिएको हो । 

तालिम विशेष गरी Learning By Doing अर्थात् गरेर सिक्ने खेल विधिमा आधारित रहेको थियो । तालिमको मुख्य उद्देश्य कृषकहरूलाई परम्परागत तथा निर्वाहमुखी खेती प्रणालीबाट आधुनिक, व्यावसायिक र आत्मनिर्भर कृषि प्रणालीतर्फ रूपान्तरण गर्नु रहेको आयोजकले जनाएको छ ।

तालिम अवधिभर कृषकहरूलाई सिमुलेसन विधिको प्रयोग गरी विभिन्न खेलहरू खेलाइएको थियो, जसका माध्यमबाट उनीहरूले कृषि व्यवसायमा आउने उतारचढाव र चुनौतीहरूलाई नजिकबाट बुझ्ने अवसर पाएका थिए । यसरी खेलिने खेलबाट सदस्यहरूले कृषि पेशा र व्यवसायलाई वास्तविक जीवनमा कसरी अगाडि बढाउने, व्यावसायिक वृद्धि र विकासका लागि कस्ता रणनीतिहरू अपनाउने र आर्थिक व्यवस्थापन कसरी गर्ने भन्नेबारे विस्तृत ज्ञान हासिल गरेका छन् । कृषकहरूको मस्तिष्कमा रहेको सैद्धान्तिक ज्ञानलाई सिधै व्यावहारिक जीवन र कार्यशैलीसँग जोड्ने प्रभावकारी काम गरेको छ ।

तालिमको समापन समारोह एभरेष्ट साकोसका अध्यक्ष  राम बाबू श्रेष्ठको सभाअध्यक्षतामा सम्पन्न भएको थियो भने कार्यक्रममा सुन्दरबजार नगरपालिका वडा नं. ७ का वडा अध्यक्ष जय राम रेग्मीले प्रमुख अतिथिका रूपमा आतिथ्यता ग्रहण गर्नुभएको थियो । कार्यक्रमलाई व्यवस्थित रूपमा संयोजन गर्ने भूमिका साकोसका सचिव एवं बिडिएस (BDS) कार्यक्रमका संयोजक विष्णु कुमार श्रेष्ठले निभाउनुभएको थियो ।

कार्यक्रममा कृषकहरूलाई थप व्यावसायिक मार्गदर्शन र प्राविधिक सल्लाह दिनका लागि लमजुङ कृषि क्याम्पसका क्याम्पस प्रमुख प्रा. डा. राम कुमार श्रेष्ठ, सोही क्याम्पसका अवकाशप्राप्त प्राध्यापक प्रो. कृष्ण बहादुर कार्की र प्राध्यापक नरेन्द्र बहादुर सिंहको उपस्थिति रहेको थियो । यसका साथै एभरेष्ट साकोसका उपाध्यक्ष विद्या देवि श्रेष्ठ, सञ्चालक समितिका सदस्य नवराज श्रेष्ठ, रामजानकी मन्दिरका अध्यक्ष बुद्धि बहादुर अधिकारी र एभरेष्ट साकोसका प्रबन्धक ज्ञान बहादुर नेपाली लगायत अन्य स्थानीय सरोकारवालाहरूको उपस्थितिमा कार्यक्रम सम्पन्न भएको थियो । 

समापनमा बोल्दै प्रमुख अतिथि रेग्मीले यस्ता व्यावहारिक र खेलमा आधारित तालिमले कृषकहरूको सोचमा परिवर्तन ल्याई स्थानीय उत्पादन बढाउन र आर्थिक स्तर उकास्न ठूलो मद्दत पुग्ने विश्वास व्यक्त गर्नुभयो ।

साकोसका कृषि पेशामा संलग्न ३० जना सदस्यहरुको सहभागीता रहेको तालिमको सहजीकरण नेफ्स्कूनका अधिकृत मन केशरी महजन र कार्यक्रम अधिकृत रीता सुवेदीले गर्नुभएको थियो ।