म्याग्दी । बेनी नगरपालिका ०१ म्याग्दी स्थित रत्नेचौर महिला बचत तथा ऋण सहकारी संस्था लिमिटेडको स्थलगत सुपरिवेक्षण सम्पन्न भएको छ । 

नेपाल बचत तथा ऋण केन्द्रीय सहकारी संघ लिमिटेड (नेफ्स्कून) द्वारा सञ्चालित नियमित निरीक्षण अनुगमन कार्यक्रम अन्तर्गत गत जेठ २४ गते उक्त सुपरिवेक्षण कार्य सम्पन्न गरिएको हो ।

नेफ्स्कूनले देशभरका सहकारी संस्थाहरूमा पारदर्शिता, उत्तरदायित्व, सदस्य हितको सुनिश्चितता, जोखिम न्यूनीकरण, सुशासन तथा दिगोपना अभिवृद्धिका लागि स्थलगत अनुगमन कार्यलाई प्रभावकारी रूपमा अघि बढाउँदै आएको छ । यसै क्रममा संस्थाको समग्र स्तरीकरणका लागि गरिएको उक्त सुपरिवेक्षणका क्रममा बचत, ऋण, ब्याजदर, वार्षिक कार्ययोजना र बजेट व्यवस्थापनका विषयमा छलफल गरिएको थियो ।

साथै संस्थाले सम्पत्ति शुद्धीकरण निवारण नीतिको पालना गरे÷नगरेको, नियामक निकायहरूबाट समय–समयमा जारी भएका निर्देशनहरूको परिपालनाको अवस्था कस्तो रहेको र संस्थाको भाखा नाघेको ऋण असुलीको प्रक्रिया कसरी अगाडि बढिरहेको छ भन्ने जस्ता महत्वपूर्ण प्राविधिक तथा वित्तीय सूचकहरूमाथि विस्तृत रूपमा सुपरिवेक्षण तथा मूल्याङ्कन गरिएको थियो ।

अनुगमनका क्रममा नेफ्स्कूनका कार्यक्रम अधिकृत मनोज खड्काले स्थलगत रूपमा संस्थाको समग्र आर्थिक अवस्था र सहकारीले सदस्यहरूलाई उपलब्ध गराउँदै आएको सेवा सुविधाको विषयमा आवश्यक प्राविधिक सुझावहरू प्रदान गर्नुभएको थियो ।

नेफ्स्कूनका कार्यक्रम अधिकृत मनोज खड्काद्धारा गरिएको सुपरिवेक्षणमा प्राप्त रचनात्मक सुझावहरूलाई आत्मसाथ गर्दै आगामी दिनमा संस्थालाई थप परिमार्जन, सुधारउन्मुख र सुशासित बनाउँदै लैजाने प्रतिबद्धता साकोसको तर्फबाट व्यक्त भएको छ ।