काठमाडौं । शुभकामना बचत तथा ऋण सहकारी संस्था लि. को आयोजना र नेपाल बचत तथा ऋण केन्द्रीय सहकारी संघ लि.(नेफ्स्कून) को प्राविधिक सहयोगमा भक्तपुरको चाँगुनारायण न.पा.वडा नं ४ स्थित होटेल विनायक एण्ड फेमिलि होममा संस्थाका संचालक समिति, लेखा सुपरीवेक्षण समिति, ऋण उपसमिति र व्यवस्थापनका वरिष्ठ कर्मचारीहरुको क्षमता अभिवृद्धि तालिम अन्तर्गत LEADERSHIP BOOTCAMP असार ०८ गते सम्पन्न भएको छ । 

असार ६ गते देखि सञ्चालन भएको तालिमको समापनमा नेफ्स्कनका अध्यक्ष चन्द्र प्रसाद ढकालको प्रमुख आतिथ्यतामा समापन गरी सहभागिहरु सबैलाई प्रमाण पत्र प्रदान गरीएको थियो । 

अध्यक्ष चन्द्रप्रसाद ढकालले आफ्नो मन्तव्यका क्रममा लिडरशिप बुटक्याम्प सहकारी दृष्टिकोणलाई व्यापक रूपमा मन्थन तथा छलफल गरिने अन्तर्राष्ट्रियस्तरको विशिष्ट तालिम हो, तालिमबाट प्राप्त ज्ञान र सीपलाई व्यवहारमा उतार्दै बोली, व्यवहार र कार्यशैलीमा स्पष्ट प्रतिबद्धता देखिनुपर्नेमा जोड दिनुभयो । साथै, आफूले बुझेको कुरा नै अन्तिम सत्य हो भन्ने सोच नराखी निरन्तर सिकाइ र आत्मविकासको प्रक्रियामा सक्रिय रहनुपर्ने सहकारीका सञ्चालक वा पदाधिकारी भए पनि सर्वप्रथम आफू सदस्य भएको अनुभूति र जिम्मेवारीबोध कायम राख्नुपर्ने उल्लेख गर्दै संस्था सफल हुनु भनेको स्वयं सफल हुनु र सहकारी अभियान सफल हुनु हो भन्ने दृष्टिकोण विकास गर्न आवश्यक रहेको बताउनुभएको थियो । 

छलफल र सहभागितामूलक अभ्यास सहकारीको मूल आत्मा भएको उल्लेख गर्दैे तालिमलाई केवल प्रमाणपत्र प्राप्त गर्ने अवसरका रूपमा सीमित नराखी त्यसबाट हासिल भएका ज्ञान, अनुभव र नेतृत्व क्षमतालाई संस्थागत विकास तथा सदस्य हितका लागि व्यवहारमा लागू गर्न सहभागीहरूलाई आग्रह गर्नुभयो । 

त्यसैगरी, संस्थाका अध्यक्ष रामप्रसाद कासुलाले यस तालिम अवधिभर सिकेका ज्ञानलाई आफ्नो व्यक्तिगत जीवन र संस्थामा समेत अवलम्बन गर्ने प्रतिबद्धता व्यक्त गर्नुभयो । 

तालिममा नेतृत्वका गुण, भूमिका, जिम्मेवारी तथा प्रभावकारी नेतृत्व विकास विषयमा प्रशिक्षण दिइएको थियो । लक्ष्यबाट वृद्धितर्फ, लाभबाट मूल्यतर्फ र खुसीबाट चुनौतीतर्फ’ लगायत विषयमा केन्द्रित रहि संघका सहायक कार्यकारी अधिकृत दुर्गा प्रसाद ढकाल र कार्यक्रम अधिकृत सुमन राज घिमिरेले सहजीकरण गर्नुभएको थियो ।