दोलखा । दोलखाको बैतेश्वर गाउँपालिका–५, मैनापोखरी स्थित जनसचेतन बचत तथा ऋण सहकारी संस्था लिमिटेड मा नेपाल बचत तथा ऋण केन्द्रीय सहकारी संघ लिमिटेड (नेफ्स्कून) ले ‘स्क्यान’ कार्यक्रम अन्तर्गत स्थलगत असार १४ गते सुपरिवेक्षण सम्पन्न गरेको छ ।

सहकारी क्षेत्रको पारदर्शिता, उत्तरदायित्व तथा सदस्यहित सुनिश्चित गर्ने उद्देश्यले सञ्चालन गरिएको सुपरिवेक्षणमा संस्थाको बचत, ऋण, लेखापरीक्षण, लगानी तथा आर्थिक कारोबारको वास्तविक अवस्था, सदस्यले प्राप्त गर्ने सेवा–सुविधा, भाखा नाघेका ऋणको कानुनी व्यवस्थापन, सम्भावित त्रुटि, आर्थिक जोखिम तथा व्यवस्थापकीय सुधारका पक्षहरूको विस्तृत समीक्षा गरिएको थियो ।

त्यसैगरी, संस्थाको निर्णय प्रक्रिया, नेतृत्वको पारदर्शिता, उत्तरदायित्व, सदस्य सहभागिता तथा प्रविधिमा आधारित सदस्य सूचना प्रणालीको प्रभावकारी प्रयोगमार्फत जोखिम विश्लेषण गरी जोखिम न्यूनीकरणका उपाय पहिचान गर्नु सुपरिवेक्षणको मुख्य उद्देश्य रहेको छ ।

नेफ्स्कूनका सहायक कार्यकारी अधिकृत दुर्गाप्रसाद ढकाल र कार्यक्रम अधिकृत राजन सुवेदीको नेतृत्वमा सम्पन्न सुपरिवेक्षणमा संस्थाका सञ्चालक समिति, विभिन्न उपसमिति, प्रमुख कार्यकारी अधिकृत तथा उच्च व्यवस्थापनका पदाधिकारीहरूको सहभागिता रहेको थियो ।

सुपरिवेक्षणका क्रममा विनियम, नीति तथा आन्तरिक कार्यविधिको कार्यान्वयन, सम्पत्ति शुद्धीकरण निवारणसम्बन्धी नीति तथा नियामक निकायका निर्देशनको पालना, भाखा नाघेका ऋणको असुली, पूँजी पर्याप्तता अनुपातको विश्लेषण, समग्र वित्तीय अवस्था तथा सदस्यलाई प्रदान गरिएका सेवा–सुविधाबारे विस्तृत छलफल गरिएको थियो ।

सुपरिवेक्षकबाट प्राप्त सुझावहरूलाई आगामी सञ्चालक समितिको बैठकमा विस्तृत रूपमा छलफल गरी चरणबद्ध कार्यान्वयनमा लैजाने प्रतिबद्धता संस्थाले गरेको छ ।