काठमाडौं । गोकर्णेश्वर काठमाण्डौं स्थित चिनारी बचत तथा ऋण सहकारी संस्था लि.को आयोजना तथा नेपाल बचत तथा ऋण केन्द्रीय सहकारी संघ लि. (नेफस्कून) को प्राविधिक सहजीकरण र जर्मन स्पार्कसेन्स्टिफ्टुङ्ग (German Sparkassenstiftung) को सहयोगमा कृषक व्यवसाय खेल तालिम श्रावण २४ गते सम्पन्न भएको छ । 

२५ जना कृषकहरुका लागि श्रावण २२ गतेबाट सञ्चालन भएको तालिम एक विशेष समारोहका बीच समापन भएको छ । संस्थाका अध्यक्ष ज्ञानेन्द्र श्रेष्ठले संस्थामा ६०% भन्दा बढी सदस्यहरु कृषि पेशामा आवद्ध रहेकोले उत्पादकत्व वृद्धि, कृषिमा लगानी र प्रतिफलको योजनाका बारेमा जर्मन पद्धतिमार्फत गरिएको खेलमुलक सिकाईबाट संस्थाबाट छनोट गरिएका सहभागीहरुबाट कृषि पेशामा उपलब्धीको योजना बनाई व्यवसायिकीकरण तर्फ लाग्नुपर्नेमा जोड दिनुभयो । 

तिन दिनसम्म चलेको उक्त सघन तालिममा सहभागीहरूले ’खेल’ र ’अभ्यास’ का माध्यमबाट व्यवसाय गर्दा आइपर्ने व्यावहारिक चुनौती र त्यसको समाधानका उपायहरूबारे गहन ज्ञान हासिल गरेका छन् । विशेषगरी बाली तथा पशुपालनको सही छनौट, उत्पादनका क्रममा हुनसक्ने मौसमी जोखिमको व्यवस्थापन र वित्तीय औजारहरूको सही सदुपयोग जस्ता विषयमा कृषकहरूलाई दक्ष बनाइएको छ ।
 
नेफ्स्कून अधिकृत तथा तालिमका प्रशिक्षक राधाकुमारी पोखरेल र राजेश खड्काले सहभागीहरूलाई बचत, ऋण र कृषि बीमाका माध्यमबाट भविष्यमा आउन सक्ने वित्तीय संकटलाई कसरी व्यवस्थापन गर्ने र बजारको मागअनुसार ग्राहकसँगको सम्बन्ध कसरी विस्तार गर्ने भन्नेबारे प्रयोगात्मक प्रशिक्षण दिनुभएको थियो ।